JERRY OLEA
Nag-bonding ang mga Kapamilya at Kapuso sa Rhea Royale, ang 40th birthday celebration ng Beautederm CEO na si Ms. Rhea A. Tan noong Nobyembre 23, Sabado, sa Royce Hotel, Clark Freeport, Pampanga.
Sama-sama ang 40+ Beautederm ambassadors sa holding area sa 2nd floor, kung saan may cocktail, bago rumampa sa pagsisimula ng programa sa grand ballroom.
Nag-duet ang Kapusong si Pauline Mendoza at Kapamilyang si Hashtag Ryle Santiago, ganoon din sina Gabby Concepcion at Lorna Tolentino na inaya pa si Ken Chan na makipag-jam.
Nag-duet din sina Ken at Rita Daniela, bago nagkaroon ng kani-kanyang solo numbers.
Mistulang nag-back-to-back concert sina Zsa Zsa Padilla at Gary Valenciano. Hataw si Mr. Pure Energy!
(From L-R) Lorna Tolentino, Gabby Concepcion, Gary Valenciano, Zsa Zsa Padilla, Ken Chan, and Rita Daniela
Biniru-biro ng host na si Smokey Manaloto si Tonton Gutierrez sa pagiging emotional nito sa performance ni Gary V.
Maski ang ibang celebrities ay luhaan sa makabagbag-damdaming pag-awit ni Gary V, na kapagkuwan ay todo-indak at palakpak sa upbeat numbers nito.
Itinanghal na best dressed celebrities sina Sylvia Sanchez at Tonton Gutierrez. Very James Bond sa Casino Royale ang kanilang dating.
Nagsilbing family affair ang Rhea Royale, kung saan mga anak ang turing ni Ms. Rhea A. Tan sa kanyang endorsers at sellers.
Ang escort ni Lorna Tolentino ay ang anak na si Rap Fernandez.
Ang kasama ni Sylvia sa pagrampa ay ang siyam na taong gulang na bunsong anak.
(L-R) Sylvia Sanchez and son Xavi, Rap Fernandez and mom Lorna Tolentino, and Ryle Santiago with mom Sherilyn Reyes
Magkasama ang mag-asawang Tonton Gutierrez at Glydel Mercado, mag-asawang Rochelle Barrameda at Jimwell Stevens, magkasintahang Ejay Falcon at Jana Roxas, mag-inang Sherilyn Reyes at Hashtag Ryle Santiago, at mag-iinang Sylvia Sanchez, Arjo Atayde at Ria Atayde—na pawang brand ambassadors ng Beautederm.
In-escort-an si Camille Prats ng mister na si John Yambao.
Kasama ni Carlo Aquino ang kasintahang si Trina Candaza.
(L-R) Glydel Mercado & Tonton Gutierrez, Trina Candaza & Carlo Aquino, Camille Prats & VJ Yambao
Kabilang pa sa mga namataan namin sa Rhea Royale ang unang ambassador ng Beautederm na si Alma Concepcion, na nagwagi ng bagong kotse sa raffle. Truly, it pays to be loyal.
Naispatan din namin ang latest ambassador ng Beautederm na si Enchong Dee, ang Powerhouse Diva na si Dessa na kumanta ng Beautederm anthem, Jestoni Alarcon, ang comediennes na sina Kitkat at Kakai Bautista, Sanya Lopez, Boobay, Luke Mejares, Ynez Veneracion, Alyanna Asistio, Alynna Velasquez, Darla Sauler, Alex Castro, Migz Magsaysay, Jane Oineza, Maricel Morales, at Shyr Valdez.
(L-R) Alma Concepcion, Pauline Mendoza & Ryle Santiago, and Kitkat
Lubos ang pasasalamat ni Ogie Diaz sa birthday celebrator, dahil sa walang sawang pagtulong nito sa mga babaeng may kanser sa suso na kinakalinga ng Kasuso Foundation.
Um-attend din si Manay Lolit Solis, na hindi alintana na tinanong pa siya ng isang waitress kung sino siya sa Goju restaurant ng Marriott Hotel.
“Napapagkamalan din akong si Cristy Fermin. OK lang iyon, basta huwag si Inday Badiday,” sambit ni Manay Lolit.
Tumpak na pak, Chuck Gomez!
NOEL FERRER
Grabeng selebrasyon ang naganap para sa Beautederm CEO, na supportive sa industry initiatives.
Sana dumami pa ang kanyang matulungan habang lumalaki ang kanyang business.
GORGY RULA
Dalawang araw ang selebrasyon kung saan taun-taon itong ibinibigay ni Ms. Rhea Tan sa kanyang distributors.
Pinaghahandaan niya talaga ito kung saan mahigit 700 distributors ang dumalo mula sa iba’t ibang bahagi ng bansa, pati sa Singapore at Amerika.
Ang pagkakaalam ko, 300 rooms ng Marriott Hotel sa Clark Freeport, Pampanga ang naka-book para sa Beautederm distributors at guests, dagdag pa ang ilang rooms na kinuha sa Royce Hotel.
“Once a year lang naman ito na treat namin sa kanila… sila naman ang dahilan kung bakit lumaki ang Beautederm.”
Sa unang araw na selebrasyon nila nung Biyernes, November 22, nagbigay sila ng awards sa ilang distributors na dinaluhan ni Marian Rivera-Dantes.
Hindi kasi makadalo si Marian sa pangalawang araw dahil 4th birthday celebration iyun ni Zia.
Sa pangalawang araw ng event ay nagbigay ng inspirational talk on beauty ang dating Tacloban Mayor Cristina Gonzales-Romualdez, na sa kabila ng malaking responsibilidad na iniatang sa kanya at ilang mga unos na pinagdaanan ay nanatili pa rin siyang maganda.
Doon ay ini-launch na rin ang men’s products nila gaya ng pomade, shaving cream, deodorant, at marami pa na ine-endorse naman ni Enchong Dee.
Sabi ni Ms. Rhea, magdadagdag pa siya ng mga kilalang endorsers sa pagpasok ng 2020.
