NOEL FERRER
Nagulat ang viewers ng TV Patrol ngayong Miyerkules ng gabi, April 21, nang sabihin ni Julius Babao na pansamantalang sila muna nina Karen Davila at Alvin Elchico ang magtataong-bahay sa news program ng ABS-CBN.
Nagse-self-quarantine daw kasi ngayon ang co-anchors nilang sina Henry Omaga-Diaz at Bernadette Sembrano.
Anong nangyari?
At kung sina Bernadette at Henry ay nagse-self quarantine, kumusta naman kaya si Kabayan Noli de Castro na ilang beses naringgan ng mga taong umuubo sa primetime newscast ng Kapamilya network?
Hayyyy, sana ligtas silang lahat sa COVID-19 at sana, since kasama na ang mga news-media frontliners sa A4 essential workers, ay mabakunahan na rin sila.
GORGY RULA
Ang lungkot din bago magpaalam ang newscasters ng 24 Oras kanina.
Nagbigay-pugay sila sa mga kasamahan sa Kapuso network na pumanaw dahil sa COVID-19.
Nagpaalam sila sa dating Vice President ng Corporate Communications ng GMA-7 na si Sir Butch Racquel na pumanaw kagabi, April 20.
Malungkot ding binanggit ni Vicky Morales na pumanaw na ang magigiting nilang cameramen na sina Caloy Samaniego at Alex Ico "sa gitna ng COVID-19 pandemic."
Tagos sa puso ang pagkasabi niyang mami-miss nila sina Caloy at Alex na madalas nilang nakakasama sa mga coverage.
Nakalungkot, at lalo pang nakakatakot. Huwag lang po tayo magsawa sa patuloy na panalangin.
JERRY OLEA
Nalungkot tayo sa Facebook post ng aktor na si Oliver Aquino nitong Abril 20, Martes ng gabi, kung saan ipinost niyang positibo siya sa COVID-19 antigen test.
Ikinalumbay rin natin ang balitang nakarating sa atin na ang isang kaibigang film-TV director ay “fighting for his life due to COVID-19” habang nakaratay sa isang ospital sa San Fernando City, Pampanga.
Dalangin nating malampasan nila ang pagsubok na ito.