Kung consistent si Angelica Panganiban na si Rodrigo Duterte ang kanyang ibobotong presidente sa national elections ngayong May 9, ang napipisil naman niyang iboto bilang vice president ay si Leni Robredo.
Ngayong araw, April 25, ipinost ni Angelica sa kanyang Instagram account ang campaign poster ng Camarines Sur Third District representative.
Sa kanyang maiksing caption, sinabi ni Angelica na sa simula pa lang ay si Robredo na ang manok nila sa pagka-pangalawang pangulo.
Si Robredo ay mula sa Liberal Party at running mate ni presidential candidate Mar Roxas,; samantalang si Alan Peter Cayetano naman ang running mate ng sinusuportahang presidente ni Angelica na si Davao City Mayor Duterte.
Samantala, sa kanyang Instagram post nitong linggo, ibinahagi ni Angelica ang larawan ng pie na nagpapakita sa pinaborang presidential candidate ng Facebook users na umabot sa higit sa 40,000.
Sa nasabing pie, nakakuha ng 60 percent si Duterte, 30 percent kay Mar Roxas, 8 percent kay Sen. Miriam Defensor-Santiago, at parehong 1 percent kina Sen. Grace Poe at Vice President Jejomar Binay.
Very vocal si Angelica sa pagpapahayag na si Duterte ang kanyang iboboto.