Dahil sa nakitang pagbibiro ng ibang mga housemates kay Gee-Ann alyas Lola Puring, pinatawag ni Kuya ang mga housemates sa confession room.
"Ang pagiging bulag ay isang sensitibong kapansanan...kapag nakakakita ba kayo ng bulag sa lansangan pinagtatawanan ninyo? Binibiro?" tanong ni Big Brother sa mga nakokonsensyang housemates.
Inamin naman ng mga housemates ang kanilang pagkakamali sa ipinakitang panloloko sa matandang bulag at humingi ng paumanhin ang mga ito sa kanilang ginawa.
"Kayo ay nasa loob ng aking bahay para maging magandang ehemplo sa lahat," dagdag na paalala ni Big Brother sa mga housemates.
Samantala, habang nasa confession room ang mga housemates ay inakala naman ni Gee-Ann na pinagtataguan siyang mga ito kaya't nagsalitang mag-isa ang dalaga sa sala ng bahay at hinawi-hawi ang kanyang baston sa pagbabakasakaling naroon lamang ang mga housemates.
Paglabas ng confession room, kapansin-pansin agad ang magandang pakikitungo ng mga housemates sa kanilang Lola Puring pero for good na kaya ito? Sundan ang mga kabanata sa buhay ni Lola Puring sa Pinoy Big Brother Season 2.