Ngayong Linggo, saksihan ang pagtatapos ng makulit at nakakakilig na love story nina Sarah Lahbati, Steven Silva, Diva Montelaba at Enzo Pineda sa part four episode ng LoveBug presents "Exchange of Hearts."
Sa pagpapatuloy ng kuwento, tuluyang nag-away sina Emil (Enzo) at Tim (Steven) dahil sa pagtatapat ni Tim kay Rachel (Sarah). Inawat sila ng kani-kanya nilang mga girlfriend ngunit wala namang makapagsabi sa kanila kung ano nga ba ang totoong dahilan ng kanilang pag-aaway sa takot na masaktan si Barbie (Diva).
Kinausap ni Barbie si Tim at hindi na niya naitagong sabihin kay Barbie na iba na ang mahal niya—si Rachel. Broken-hearted pero pursigido pa rin si Barbie kaya't nakiusap siya kay Rachel na huwag agawin sa kanya si Tim at tulungan siya na magkabalikan silang muli.
Out of guilt, nag-decide na si Rachel na itago ang nararamdaman kay Tim para kay Barbie.
Nang magkaayos na sina Emil at Tim, nagbilin si Emil kay Tim na alagaan si Barbie dahil napakasuwerte raw nito sa kanya. Taka naman si Tim na ganun na pala kalalim ang pagiging magkakilala nina Emil at Barbie. Sinubukan ni Tim na bigyan ng chance ang relationship nila ni Barbie pero alam ni Barbie na wala na talagang pag-asang maibalik ang dati nilang pagtitinginan.
Napagdesisyunan ni Barbie na hayaan na si Tim na balikan si Rachel. Ibinalik na ni Emil si Rachel sa kanyang ina at pinanindigan na ni Rachel kay Fina (Angelu de Leon) na si Emil na nga ang pinipili niya kahit si Tim naman ang mahal niya. Pero pansin ni Emil na hindi na masaya si Rachel sa kanya. Alam niyang ang tunay na mahal ni Rachel ay si Tim.
Magkakatuluyan kaya sina Tim at Rachel? Paano ipagtatapat ni Emil ang pagkagusto niya kay Barbie? Magkaroon kaya ng happy ending ang love story ng apat?
Sundan ang ikaapat na yugto ng LoveBug presents "Exchange Of Hearts" ngayong Linggo, August 29 pagkatapos ng Party Pilipinas sa GMA.