Kumpirmado na ang balitang si Joel Lamangan ang magdidirek ng bagong pelikulang gagawin nina Judy Ann Santos at Ryan Agoncillo under Regal Entertainment. Ito ang naibalita sa PEP (Philippine Entertainment Portal) ng isang reliable source.
Ang scriptwriter ng pelikula nina Juday at Ryan ay si Allan Tijamo, isang award-winning playwright ng Palanca Awards, na siya ring sumulat ng script ng Blue Moon ng Regal.
Naging maganda ang tambalan nina Direk Joel at Allan sa Blue Moon dahil dito sila umani ng awards from different award-giving bodies, partikular na ang 22nd Star Awards which gave Direk Joel the Movie Director of the Year award at kay Allan naman ang Movie Screenplay of the Year trophy. Wala nga lang sa Pilipinas last year si Allan at nasa US kaya hindi niya personal na natanggap ang kanyang trophy from the Philippine Movie Press Club (PMPC).
Hindi pa makumpirma ng aming source kung ano ang working title ng Judai-Ryan movie sa Regal, pero may narinig kaming Together Forever or something to that effect.
Matatandaang nung nagpatawag ng presscon si Mother Lily Monteverde for the contract signing nina Juday at Ryan sa Regal, wala pang nai-announce na direktor, at nabanggit pa doon na dapat daw ay maiba ito sa kuwento ng blockbuster na Kasal, Kasali, Kasalo ng Star Cinema.
Si Direk Joel din nga pala ang nagbigay ng ilang best actress wins and nominations for Juday para sa Sabel, mula pa rin sa Regal.
Kasalukuyang itine-tape ni Direk Joel ang Sinasamba Kita mini-drama series ng GMA-7. Sina Juday at Ryan naman are working on their Ysabella soap opera sa ABS-CBN, at tinatapos din ng young superstar ang shooting ng Ouija with Jolina Magdangal para sa GMA Films and Viva Films.