Sa press con para sa senatorial candidate na si Cesar Montano kahapon ng tanghali sa Annabel's restaurant ay nakausap ng PEP (Philippine Entertainment Portal) ang kanyang misis na si Sunshine Cruz. Galing sa Cebu ang aktres kaya late siyang dumating.
Kung gaano kahaba ang pahayag ni Cesar, iyon naman ang iksi ng sagot ni Sunshine sa mga tanong sa kanya.
Affected ba si Sunshine na pinag-aaway ang asawa niya at ang isa pang senatorial candidate na si Richard Gomez?
Ayon kay Sunshine, "Nakarating sa akin ang balita. Pero hindi ako apektado dahil alam kong imposibleng sabihin ng asawa ko yun, lalo na sa kapwa artista. May gumagawa lang siguro ng intriga, at sana, hindi na dapat palakihin pa dahil hindi makakatulong sa kanilang dalawa."
Pakiusap niya, "Sana lang, bago mag-react, tumawag muna. We're just a phone call away. A simple call or text to clear things up."
Nabanggit ni Richard sa isang interview na tumawag diumano sa kanya ang isang brother ng dating aktres na si Teresa Loyzaga, who has a child by Cesar. Sinabi diumano ng kapatid—hindi binanggit kung si Caloy o Joey—na walang child support si Cesar sa anak nito kay Teresa. Ano ang reaksiyon ni Sunshine dito?
"I don't wanna talk about it," pag-iwas niya. "It's too personal, at sana huwag nang isali sa usapan. Saka alam ng asawa ko ang kanyang obligasyon. I have nothing against anybody."
Pati si Sunshine ay hindi rin nakaligtas sa intriga. May kumalat na balita na ginagastos diumano niya ang campaign fund ni Cesar at ipinagpatayo nila ng bahay. Any reaction?
"It's so unfair," depensa niya. "Never kong ginagalaw ang campaign fund niya. Accounted for lahat ang lumalabas na pera at kung ano lang ang nandu'n, pinagkakasya namin. Mabuti na lang at hindi naniniwala ang donors at sumusuporta sa asawa ko dahil panay pa rin ang dating ng financial support. May mga nagwa-wire pa ng pera from friends abroad, pero tamang-tama lang para makagalaw ang kampanya ni Buboy," pahayag ni Sunshine.