"I go here and there [ABS-CBN], hindi naman ako exclusive sa kahit saan, e. I mean if I can work with anybody, why not? Natutuwa lang ako dahil may tiwala pa rin sa akin ang Siete, binigyan ako ng project. Sa akin, there's nothing wrong with working with everyone," explains Dina Bonnevie about her return to GMA-7.

Photo: Noel Orsal


Matapos ang ilang taon, magbabalik ang aktres na si Dina Bonnevie sa GMA-7. Matagal-tagal na ring hindi nakakatuntong si Dina sa bakuran ng Kapuso network, kung saan may ilang significant projects siyang ginawa before—gaya ng talk show niyang Ms. D! at ang soap opera na Narito ang Puso Ko.

 

"Oo nga, its been a long time since I was last here. Medyo matagal-tagal na din ‘yon, ilang taon na rin. Pero in fairness naman, I did two soaps here saka yung Ms. D and D Day, di ba?" kuwento ni Dina sa PEP (Philippine Entertainment Portal).

 

Nagbalik si Dina sa GMA-7 para gawin ang TV remake ng Lino Brocka classic na Babangon Ako't Dudurugin Kita. Tambok din dito nina Yasmien Kurdi at Angelika dela Cruz. Ang magiging role ni Dina rito ay ang ginampanan sa pelikula ni Mona Lisa.

 

"Maganda yung role," banggit ng aktres. "Saka sa akin naman kasi, I wasn't like... I mean, I go here and there [ABS-CBN], hindi naman ako exclusive sa kahit saan, e. I mean if I can work with anybody, why not? Natutuwa lang ako dahil may tiwala pa rin sa akin ang Siete, binigyan ako ng project. Sa akin, there's nothing wrong with working with everyone.

 

"I think I'm playing the role of Mona Lisa. Kaya lang, sabi nga nila, medyo stylized na. Hindi naman gagawing ganun ka-old [‘tulad] ni Mona Lisa," lahad ni Ms. D.

 

YOUNG GRANDMOTHER. Naikuwento rin ni Dina ang kanyang napipintong pagiging lola sa tunay na buhay. Noong isang linggo ay nakumpirma na nagdadalantao ang kanyang panganay na si Danica Sotto sa mister nitong si Marc Pingris.

 

"Grandmother? Actually, sa akin it doesn't bother me. A lot of people say, ‘O, magiging lola ka na, you're a grandmother.' Sa mind ko lang, e, do I look it? Basta ba I'm the cutest granny, e, care!" tawa niya.

 

"I'm looking forward to it na sana maging healthy yung bata, sana maging normal, na walang magiging kapansanan. Kaya sinasabi ko kay Danica, mag-ingat siya. I really wish and hope and pray that it's going to be a normal child and we're happy, we're waiting for the baby to come. Bago palang naman, wala pang two months," pahayag ni Dina.

 

"Parang ayokong gamitin yung word na grandma. Puwede bang next year na natin gamitin yun ‘pag talagang isinilang na yung bata?" pahabol niya.

 

Dagdag pa ni Dina, nahihirapan daw si Danica sa kanyang paglilihi. Pero mas napalapit daw lalo sila ng kanyang panganay.

 

Kuwento niya, "Oo, napakahirap niyang maglihi. Kahapon, nandun siya sa bahay ko ‘tapos wala akong ganang kumain. Sabi niya, ‘Mommy, hindi ka pa kumakain.' Naku, nung tumabi siya sa akin, biglang nagutom ako! All of a sudden gusto kong kumain ng ice cream, gusto kong kumain ng chocolate. Sabi ko, e, hindi naman ako mahilig sa matamis... Bakit ganun, tumabi lang sa akin si Danica, para akong nagutom, para akong naglilihi. Sabi ko, ‘Lumayo ka sa akin dahil napupunta sa akin paglilihi mo.'

 

"She's very sensitive lately. Konting ano, iyak nang iyak. Siguro ganun yata talaga kapag naglilihi, parang you want to be beside your mom, your dad. Pumupunta siya palagi sa akin, ‘tapos pumupunta din sa daddy niya [Vic Sotto]."

 

MOTHER TO DANICA & OYO. Ibang-iba na rin daw ang pagtrato ni Dina sa kanyang mga anak ngayong nasa hustong gulang na ang mga ito.

 

"Difference? Siyempre being a mother to Danica is different kasi siyempre babae siya. Iba naman ang mga pangangailangan ng babae. It's more or less comparing notes, parang ‘Mommy, turuan mo ako.' Kasi yung pinagdaanan mo at saka yung pinagdaanan kong hindi maganda, ayokong pagdaanan niya. So, parang she asks you how to cook, how to take care of herself. Ano ba'ng mga na-discover mong mali sa pag-aasawa, mga stuffs like that, so it's different," paliwanag ni Dina.

 

"Kay Oyo naman, dahil lalake siya, siyempre wala kaming comparing notes thing. Kay Oyo, it's more of payo. Parang siguro mga kaugaliang nakita ko sa lalake or whatever... Huwag na nating banggitin ang kanyang father, kunwari yung mga ex na hindi ko nagustuhan ang ugali...I tell him, ‘Don't be like this to your wife, don't be like this to your girlfriend kasi hindi magandang ugali ‘yon, ganito ganyan.' Or, ‘Gaya niyan, you have to finish your studies. Kailangan makapagtapos ka ng isang degree para hindi ka man magpatuloy sa pagiging artista, meron kang pagkukuhanan ng income para sa pamilya mo, di ba? Meron kang maio-offer, you can put up your own business, then kailangan maging center ng family n'yo si God.'"