"Ngayon di mo ako nirerespeto dahil kinakalaban mo anak ko, pati mga apo ko tinatamaan mo. Ngayon, Lolit Solis, kung matapang ka, hinahamon kita. Sabihin mo saan, ano'ng oras, gusto mo mag-upakan tayo ngayon din, okay sa akin!" nanggagalaiting pahayag ni Annabelle kay Mario Dumaual ng TV Patrol World.

Dagdag pa ni Annabelle, itinapon daw ni Lolit ang mahigit tatlumpung taon nilang pagkakaibigan dahil sa kanyang mga komento. Sinabi ng palabang ina ni Ruffa na partikular siyang na-offend sa sinabi ni Lolit na maraming babae ang nagkakandarapa kay Bong dahil sa "nota" nito, na parang pinalalabas na ganoon din si Ruffa.

Ani Lolit sa interview ni Ogie sa kanya, "Malaki kasi ang nota niyang si Bong, kaya naeelya-elya ang mga babae sa kanya! Maglaway-laway man sila sa nota ni Bong, si Lani pa rin ang legal wife!"

Isiniwalat din ni Annabelle na bago ang interview ni Lolit sa radio program ni Ogie ay nagkausap na sila ni Lolit. May usapan na raw sina Annabelle at Lolit na huwag nang palakihin ang isyu, pero hindi raw tumupad sa kanilang kasunduan ang manager ni Lani.

"May usapan na tayong dalawa kahapon [March 4], bakit nag-ano ka...nag-iba ng usapan ngayon? Tinitira mo si Ruffa sa radyo at saka sa diyaryo. Huwag kang ganyan, 'Day. Huwag kang maging duwag. Ako ang kalabanin mo," sabi ni Annabelle sa panayam naman sa kanya ni Lhar Santiago sa 24 Oras.

Hindi rin nakaligtas kay Annabelle ang alaga ni Lolit na si Lani.

"Bakit ang anak ko ang iniisnab-isnab mo? Bakit, ano ba ang nagawa ni Ruffa sa 'yo? Sabi mo magsu-sorry si Ruffa sa 'yo, for what?" ani Annabelle sa 24 Oras.

Pinaratangan din ni Annabelle si Ogie ng pag-atake sa kanyang pamilya sa media.

"Isa ka pa, Ogie Diaz, humarap ka rin sa akin! Lagi mong sinisiraan sina Ruffa at Richard. Kayong dalawa ni Lolit, kayo against me!" sabi ni Annabelle sa TV Patrol World.

Napag-alaman din ng PEP (Philippine Entertainment Portal) na sinubukan daw tawagan ni Lolit si Annabelle, pero pinagbagsakan ng telepono ng ina ni Ruffa ang manager ni Lani.