Mapapaaga ang 10-day European trip na gift ni Anne Curtis sa kanyang sarili.
Sa isang thanksgiving merienda last Tuesday, May 6, held at the 6th floor of Viva Films in Tektite Road, Pasig City, sinabi ni Anne sa PEP (Philippine Entertainment Portal) na sa halip na May 15, aalis na siya sa Monday, May 12. Bakit napaaga ang alis niya?
"This week, sinimulan ko na ang mga test shots ko for Dyosa," nakangiting wika ni Anne. "Sa tatlong characters ko bilang goddess na anak nina Mariang Sinukuan at Bernardo Carpio, nauna kong ginawa 'yong goddess of the sea. Half-fish, half-human ako.
"Happy na nga ako na nagampanan ko na rin ang role ng isang sirena. Palagay ko, sinadya 'yon ng ABS-CBN para matupad ang matagal ko nang wish. Pero gusto ko pong linawin na hindi major part ng story ang pagiging sirena ko, dahil mga illusions lamang iyon.
"Like ang pagiging goddess ko of the land na isa akong centaur [half- human, half-horse] at goddess of the air, na half-human, half-eagle ako with wings. Sa lahat ng tatlong characters ko, iba-iba ang hairstyle ko, kaya nagpa-hair extension ako at, promise, magugustuhan ninyo ito.
"Habang wala ako, aayusin na ito [scenes] ni Direk Wenn Deramas para pagbalik ko, kung okey na, tuluy-tuloy na ang taping namin."
Binanggit din ni Anne na katatapos din lamang niyang pumirma ng three-year, three-picture contract sa Viva Films at gagawa sila, for the first time, ng movie ng nali-link sa kanyang si Sam Milby, na co-production venture ng Viva Films at Star Cinema.
TALKING TAGALOG AND GOING TO EUROPE. Napansin ng PEP na very fluent na siyang magsalita ng Tagalog.
"Nagsimula po ito nang gawin ko ang Kampañerang Kuba, na talagang hindi ako pinagsalita ng kahit isang English word. Inaabot ako ng umaga sa pagme-memorize ko ng dialogue kahit paulit-ulit, dahil iyon ang gusto ni Direk Wenn, na nakatulong naman talaga sa akin."
Saan-saan ba siya pupunta sa trip niya?
"Sa Paris [France] ang first stop ko, gusto kong makita ang Eiffel Tower at ibang landmarks doon," kuwento ni Anne. "Medyo scared nga po ako dahil sabi nila, marami raw magnanakaw doon, mag-isa pa naman akong magta-travel. Pero pagdating ko roon, may classmate akong makakasama, doon na kami magkikita. May mga tips na ngang ibinibigay sa akin iyong mga nakapunta na roon. Mag-iingat na lang akong mabuti."
May nag-suggest kay Anne na nasa Paris ngayon si KC Concepcion at nagbabakasyon din, bakit hindi sila mag-meet?
"Naku, nakakahiya po naman, hindi pa naman kami formally na-introduce ni KC."
Chanel pala ang signature brand na paborito ni Anne, at since nasa Paris siya, tiyak na dadalawin niya ang store nito.
"Nag-promise po ako sa sarili ko na titipirin ko ang euro [pera sa Europe] ko dahil ang mahal daw doon. Pero gusto ko pong bumili ng kahit isang item man lang sa Chanel store. Para masabi kong nakapunta talaga ako roon.
"Next stop ko sa Spain. Tamang-tama na iyong stepsister ko sa daddy ko, lilipat sa Ibiza, Spain, sa May 14. Kaya pagdating ko roon, nandoon na siya. Gusto ko ring puntahan ang Barcelona para makita iyong Sagrada de Familia Church. Talaga pong magpapa-picture ako roon."
Natanong din si Anne kung bakit hindi mag-join sa kanya si Sam, para may kasama siya.
"May show po siya sa New York and from there, tutuloy siya ng Australia, may show siya roon sa May 22 and 23 at doon na siya magsi-celebrate ng birthday niya. Saka gusto ko po talagang mag-travel na mag-isa. Next year, gusto ko namang sa Italy pumunta."
WANTS TO WORK WITH ANNABELLE. May nagtanong kay Anne kung sakaling papiliin siya ng gusto niyang makasama sa movie, sino ang pipiliin niya?
"Gusto ko pong maka-work si Tita Annabelle [Rama]. Maganda po ang feedback na naririnig ko sa movie nila ni Ruffa [Gutierrez] na My Monster Mom.
"If you still remember, ako ang unang gumanap na young Annabelle nang gawin ang story nila sa Maalaala Mo Kaya. Pero noong araw po ayaw sa akin ni Tita Annabelle nung kami ni Richard, kasi may reputation po raw ako na papalit-palit ng boyfriend. Pero later on, gusto na rin po niya ako dahil na-prove ko naman sa kanyang hindi totoo ang intrigang iyon sa akin."
Sinu-sino ba ang naging boyfriend niya?
"Si Chubi [del Rosario] noong TGIS days namin, then si Oyo Boy [Sotto], si Richard and then si Paolo [Araneta]. Naging dates ko lang noon si Derek [Ramsay], si Luis [Manzano], na muntik ko na ring maging boyfriend, pero hindi siguro kami talaga, soulmates lang kami. Then there's Brad [Turvey].
"Nang makilala ko si Luis, huminto na akong makipag-date kay Derek. Kami na sana ni Sam [Milby] noon, but we broke off nang maging Christian na ako.
"But now, Sam is the first guy who courted me in this manner. He is really following the guidelines ng pagiging Christian at ng book na When Boy Meets Girl. We're dating, but no commitments. No responsibilities between us."
Tiyak na dahil magkalayo sila ni Sam, magiging busy kaya ang cellphones nila?
"Hindi po. When I'm out of the country, ayaw ko po namang nakadikit lagi ang cellphone sa tenga ko. Siguro, paminsan-minsan, pero mas gusto ko po talagang mag-concentrate sa pamamasyal ko."
FRUSTRATED SINGER. Isa si Anne sa top endorsers ng different products among celebrities. In fact, while she will be away, may dalawa pa siyang bagong TV commercial na lalabas. May movies, at TV shows din siyang ipapalabas. Bukod kasi sa Dyosa, kasama rin siya sa gag show na Banana Splitz.
May frustration pa ba si Anne sa pagiging artista niya?
"Yes po, ang magkaroon ng magandang voice. Gusto ko po kasing maging singer. Pero tanggap ko na pong hindi ako magiging singer dahil sa eleven years ko nang artist ng Viva Films, never po akong nakatanggap ng offer mula sa Viva Records," nagtatawang wika ni Anne.
"Okey na rin po naman na nakakakanta ako sa ASAP '08 at sa mga malls kapag nagpu-promote ako ng movie or TV show namin," patapos na wika ni Anne.