Ayon pa sa isang customer, halata raw sa reaksiyon ni Gretchen na napahiya siya sa nangyari dahil siya diumano ang nagyaya ng naturang dinner. Pagkatapos nito ay nakita raw ng ilang customers ang aktres na parang gigil na gigil habang nagti-text.

Noong bandang alas-onse ng gabi ay dumating daw sa Dusit Hotel si Tonyboy na mukhang inis, ayon sa mga customer na nasa lobby.

Dagdag na kuwento ng mga saksi, sa lobby pa lang daw ng hotel ay nagsisisigaw na si Gretchen kay Tonyboy. Hinila pa diumano ng aktres ang ka-live-in papunta sa ladies' room. Dinig daw hanggang labas ang pagsisigawan ng dalawa at nang lumabas sila ay halatang umiyak si Gretchen.

Pagbalik daw ni Gretchen sa restaurant ay ikinuwento nito sa kanyang mga kasama ang nangyari sa kanila ni Tonyboy. Sinabi raw ni Gretchen sa kanyang mga kaibigan na nagalit daw ang kanyang live-in partner sa kanila dahil ikinumpara nila ito sa asawa ni Ruffa na si Yilmaz.

Nabanggit daw ni Gretchen kay Tonyboy ang sinabi ng isa sa grupo na baka pinutol ng negosyante ang credit card ng aktres. Ang mariing sabi raw ni Tonyboy kay Gretchen ay "I am not Yilmaz!"

Dahil sa nangyari ay mukhang nagkatampuhan sina Gretchen at ang mga kaibigan niyang sina Ruffa, Pops, at "Josie." Nagulat daw ang mga ito dahil idinawit pa ni Gretchen ang mga pangalan nila sa away ng aktres at ni Tonyboy.

May nagsabi ring isang source na ipinakuha pa nga raw ni Gretchen sa waiter ang perang ibinayad ni Ruffa. Isasauli raw kasi ni Gretchen ang pera ni Ruffa at siya na lang ang magbabayad. Pero hindi na raw puwede dahil naipasok na sa cash register ang perang ibinayad ni Ruffa.

SCENE AT THE WAKE. Ang pangalawa namang eksena ay naganap ilang saglit lamang pagkatapos ng eksena sa hotel. Ito naman ay nangyari diumano sa burol ng aktor na si Rudy Fernandez sa Heritage Park, kung saan daw dumiretso si Gretchen at ang kapatid niyang si Marjorie.

Ayon sa ilang artistang nakasaksi ng mga pangyayari, nagpunta raw sina Gretchen at Marjorie sa VIP room, kung saan nag-i-stay ang mga artista at iba pang mga nakikiramay sa pamilya ni Daboy.

May nakakita raw kay Gretchen na kumikindat-kindat sa actor-politician na si Bong Revilla na nasa kabilang table. Hindi naman daw sigurado ang mga nakakita kung nakita rin ni Bong ang pagkindat-kindat diumano sa kanya ni Gretchen. Pero napansin ng aming source na naging uncomfortable daw ang hitsura ng senador.

Nandun din daw sa VIP room ang misis ni Bong na si Lani Mercado. Napansin na lang ng source na tumayo si Lani at pumunta sa likuran ng kanyang mister. Ang hindi matukoy ng mga witnesses ay kung lumapit ba siya sa asawa dahil nakita niya ang ginagawa ni Gretchen o nagkataon lang.

Hindi naman kaila sa lahat na nagkaroon ng romantic relationship noon sina Bong at Gretchen, na siyang naging ugat ng alitan nina Lani at Gretchen.

Narinig din daw na pinagsabihan ni Marjorie ang kapatid na tigilan na ang kanyang ginagawa. Pero ang sagot daw ni Gretchen sa kanya ay sinusubukan lang niya kung uubra ang pagpapa-botox niya kay Bong.