Matagumpay na naisagawa ng Philippine Movie Press Club (PMPC) ang first televised award-giving ceremony this year na 24th Star Awards for Movies kagabi, June 27, sa Henry Lee Irwin Theater sa Ateneo University. Mapapanood ang naturang awards night sa Linggo, June 29, sa ABS-CBN.
Mahigit 25 categories ang pinaglabanan sa 24th Star Awards for Movies para sa
mainstream movies at digital films. Out of the 25 categories, 16 ang para sa
mainstream movies at siyam sa digital films. Bukod pa rito ang special awards
ng PMPC na Darling of the Press award at ang Ulirang Artista Awardee
(Lifetime Achievement Award).
Nakakuha ng apat na awards ang One More Chance, including Movie of the Year para sa Star Cinema, Movie Cinematographer of the Year kay Manuel Teehankee, Movie Editor of the Year kay Marya Ignacio; at ang kauna-unahang karangalan para kay Cathy Garcia-Molina bilang Movie Director of the Year.
Napaluha namang tinanggap ni Ai-Ai delas Alas ang kanyang ikalawang tropeyo bilang Best Actress sa Star Awards for Movies; this time para sa pelikulang Ang Cute Ng Ina Mo. Hagalpakan sa tawa ang mga tao sa speech ni Ai-Ai na bakit ang mga kapwa niya nominado ay pawang crying scenes ang ipinakita. Samantalang ang ipinalabas na eksena ni Ai-Ai kagabi ay yung nahulog siya sa hagdan.
Ibinahagi ni Ai-Ai ang kanyang award sa mga co-nominees niya na sina Maricel Soriano, Lorna Tolentino, Judy Ann Santos, Bea Alonzo, at Cherry Pie Picache. Nagpasalamat din siya sa Maykapal dahil sa gitna ng kontrobersiya—ang pagkakadawit ng pangalan niya sa hiwalayang Kris Aquino at James Yap—ay may kapalit naman palang kaligayahan.
Nanalo si Paolo Contis bilang Movie Actor of the Year para sa pelikulang Banal. Nang i-announce ang winner sa kategoryang ito ay katabi ni Paolo sa upuan ang co-nominee niya na si Ryan Eigenmann, na ang aga-agang dumating sa venue.
Present din ang co-nominee ni Paolo at strong contender for the Movie Actor of the Year category na si John Lloyd Cruz.
Umeksena naman sa pag-akyat hanggang sa pagtanggap ng award niya as Movie Supporting Actress of the Year si Eugene Domingo para sa digital film na Pisay.
Movie Supporting Actor of the Year si Emilio Garcia para sa pelikulang Selda. May taping that night si Emilio, pero nagawa niyang magpaalam muna para maka-attend ng Star Awards.
Si Nash Aguas naman ang nag-uwi ng award para sa Movie Child Performer of the Year para sa pelikulang Angels. Si Lovi Poe ang napili bilang New Movie Actress of the Year para sa Shake, Rattle & Roll 9, kung saan nanalo rin si Matt Evans bilang New Movie Actor of the Year.
Ang iba pang kategorya para sa mainstream ay napagwagihan nina Willie Urbino, Movie Production Designer of the Year para sa Ataul For Rent; Vanessa Valdez, Movie Original Screenplay para sa A Love Story; Raul Mitra, Movie Musical Scorer of the Year para sa Paano Kita Iibigin; Ditoy Aguila at Rudy Gonzales, Movie Sound Engineer para sa Ouija; at si Ogie Alcasid, Movie Theme Song of the Year para sa Paano Kita Iibigin. Pinasalamatan ni Ogie sa kanyang acceptance speech ang kanyang "honey" na si Regine Velasquez for the inspiration.
Si Ogie rin ang tumanggap in behalf of Regine na nanalo bilang Darling of the Press ng PMPC. Ang nakatatandang kapatid na babae na si Marie Fernandez ng yumaong aktor na si Rudy Fernandez ang tumanggap ng Ulirang Artista award para sa aktor.
Out of the nine categories for digital films, hinakot ng Cinema One Originals winner na Confessional ang limang awards. Ang Confessional ng Creative Programs, Inc thru Cinema One Originals and Oddfield Productions ang nanalo bilang Digital Film of the Year, Digital Movie Director para kay Jerrold Tarog at Ruel Antipuesto, Digtial Movie Editor of the Year kay Pats Ranyo, Digtial Original Movie Screenplay kay Ramon Ukit, at Digital Movie Sound Engineer kina Ditoy Aguila at Rudy Gonzales.
Ang nanalo naman bilang Digital Film Original Theme Song ay "Nandito Ako" ng Selda na ginawa nina Paolo Villaluna at Pike Ramirez. Digtial Movie Scorer naman sina Vince de Jesus at Jobin Ballesteros para sa Pisay; Digital Film Cinematographer si Rodolfo Aves Jr. ng Kadin; at Digital Film Production Designer si Danny Red para sa Selda.
May special awards din na ibinigay that night para sa mga celebrities na dumating. "Celebrity Fab of the Night" sina Piolo Pascual at Maja Salvador mula sa Nature's Harvest Fab; "Celebriy Mom of the Night" ang host ng 24th Star Awards for Movies na si Dawn Zulueta, courtesy of Cebuana Lhuillier; Faces of the Night naman si Piolo ulit at si Pops Fernandez mula sa Mendez Medical Group; at Stars of the Night sina John Lloyd Cruz at Eula Valdes mula sa Lucida-DS Glutathione.