MANNY AS A FAMILY MAN. Kinumusta naman ni Ruffa Mae kay Manny ang asawa nitong si Jinkee Pacquiao, na apat na buwang buntis sa panga-apat nilang anak. Balitang babae ang dinadala ngayon ni Jinkee sa kanyang sinapupunan. Ano ang pakiramdam ni Manny na magiging dalawa na ang kanyang anak na babae?

"Masaya!" bulalas niya. "Kasi, perfect ang pagkakagawa ko. Dalawang lalaki, ‘tapos dalawang babae naman na sunod. Nagkatotoo na sabi ko, dalawang lalaki, dalawang babae."

Speaking of Jinkee, naging solid supporter naman daw ang asawa sa kanyang career. Pero masasabi ba ni Manny na nagkaroon sila ng malaking away ni Jinkee dahil sa mga intriga?

"Marami!" natatawang pag-amin ni Manny.

Pero ayaw sagutin ni Manny nang tanungin siya ni Rufa Mae kung ano ang isang intriga na pinag-awayan nila nang husto. "Ako kasi, kapag nag-aaway kami, kapag inaaway ako ng misis ko, mas lalo siyang nagagalit. Tinatawanan ko lang siya at tumatawa ako," lahad ni Manny.

THE KILLER QUESTION. Inulit ni Manny ang sinabi niya sa umpisa na parang kinakabahan siya noong nabasa niya ang Killer Question at Killer Task. Sa huli, ang pinili ni Manny ay ang Killer Question, pero sabay sabi na, "Tama ba itong pinili ko?" habang tumatawa.

Ito ang Killer Question para kay Manny: "Simula nang maging public figure ka, napakarami na rin ang humanga sa ‘yo dahil sa mga karangalang naibigay mo sa bansa kaya hindi na rin maiiwasan kung maraming babae ang nahuhumaling or nali-link sa ‘yo. Among the girls na nali-link sa ‘yo, sino sa kanila ang pinaka-pinagselosan ng asawa mong si Jinkee?"

"'Yang Misis ko, nagagalit ‘yan kapag nahuhuli ka sa text!" tawa ni Manny. "Like, ‘ingat ka...' Among those girls na nakilala ko, isa sa kanila."

"Secret," ang unang sagot ni Manny when Mo asked kung sino sa mga babaeng na-link sa kanya at kung taga-showbiz din ba ito. Pero ipinaalala ng dalawang host na hindi puwedeng secret dahil yun ang secret question na kailangang ma-reveal.

Kaya sinagot naman ito ni Manny ng, "Non-showbiz."