Nakatanggap ng tawag ang PEP (Philippine Entertainment Portal) mula kay Mommy Rose Flamianiano pasado alas-onse kagabi, September 23, para ibalitang sumakabilang-buhay na ang ama ni Gabby Concepcion na si Mr. Rollie Concepcion.
Malungkot si Mrs. Flaminiano sa pangyayari, lalo't nakamatayan ni Daddy Rolllie ang hindi pagkakaunawaan ng lady producer at ni Gabby. Pero naniniwala rin si Mrs. Flaminiano na hindi dapat isisi sa away nila ni Gabby ang pagkamatay ng nakatatandang Concepcion. Rason niya, kung halimbawa ba na na-high blood si Mrs. Flaminiano at inatake, isisisi rin daw ba yun kay Gabby?
Tinanong din ng PEP si Mrs. Flaminiano kung pupunta siya sa burol ng ama ni Gabby.
"Kilala ko naman siya. Pupunta ako pero umaga. Yung walang masyadong tao at wala si Gabby," saad niya.
Ayaw munang magsalita at sumagot ni Mrs. Flaminiano sa mga pahayag ni Gabby tungkol sa isinampa niyang kaso, Specific Performance and Damages with Application For Writ of Preliminary Injunction and Prayer for Temporary Restraining Order, bilang respeto sa pagpanaw ng ama ng aktor at bilang pakikiramay na rin.
Basta't kung may bibili man daw ng kontrata ni Gabby para lumaya na siya sa poder ni Mrs. Flaminiano, bibitiw raw siya sa halagang P50 million. Bukod dito, humihingi pa ng retraction si Mommy Rose sa lahat ng sinabi ni Gabby tungkol sa kanya.
WILLING TO FACE NADIA. Ibinalita rin ni Mrs. Flaminiano na may live guesting siya sa Startalk sa Sabado, September 27. Willing niyang harapin ang tinagurian niyang "sulsoltant" ni Gabby na si Nadia Montenegro. Hindi raw siya natatakot kung anumang hakbang ang binabalak gawin ngayon ni Nadia.
"Talagang hindi kami magka-level. Tingnan mo ang buhay niya ngayon sa buhay ko," mataray na buwelta ni Mrs. Flaminiano sa sinabi ni Nadia na "I won't ever stoop down to her level." Ang naturang pahayag ni Nadia ay bilang sagot naman sa mga paratang ni Mrs. Flaminiano sa kanya. (Click here to read related article.)
Pinabulaanan din ni Mrs. Flaminiano na mainit ang dugo niya kay Nadia dahil every time daw na may gagawing desisyon si Gabby, lagi raw nasasabi ng aktor na "I think I have to talk to Nadia about this."
"Wala namang ganung dialogue si Gabby ‘pag nag-uusap kami. Ano'ng ilusyon na naman ‘yan?" bulalas ni Mrs. Flaminiano.
"Todo dikit lang naman ‘yan kay Gabby after the Music museum concert," dagdag niya.
Ang pagpayag ni Mrs. Flaminiano na mag-guest sa Startalk ay bilang pasasalamat na rin sa dating manager ni Gabby na si Lolit Solis sa magagandang salita na binitawan ng TV host-talent manager tungkol sa kanya noong nakaraang Sabado, September 20. (Click here to read related article.)
