Nakausap ng PEP (Philippine Entertainment Portal) at iba pang piling entertainment editors ang lady executives ng GMA-7 sa isang intimate lunch last Friday, September 26, sa 17th floor ng GMA Network Center.
Ang mga nakausap namin ay sina Ms. Wilma Galvante, SVP for Entertainment TV; Ms. Marivin Arayata, VP for Entertainment TV; Ms. Lilybeth Rasonable, AVP for Drama; Ms. Darling de Jesus, AVP for Musical & Variety, at Ms. Janine Piad-Nacar, AVP for Games & Talk.
Bukod sa paglalatag ng kanilang lineup of shows for the rest of 2008 at sa unang bahagi ng 2009 (Click here to read related article), nagbigay rin ng pahayag ang naturang executives ng GMA-7, partikular si Ms. Wilma, tungkol sa mga Kapuso stars na umalis at pati na ang pakikitungo ngayon ng network kay Annabelle Rama.
GOODBYE & HELLO. Noong nakaraang linggo ay nabalita na pormal nang nagpaalam si Lorna Tolentino kay Ms. Wilma. Tinanggap na ng aktres ang offer ng ABS-CBN. (Click here to read related article.)
Kuwento ni Ms. Wilma, "On LT, nagpaalam siya. Kasi ang reason niya, gusto niyang gawin yung movie [sa Star Cinema]. Meron daw kinomit sa kanyang movie. ‘Tapos sa series, baka may series siya. She didn't elaborate. But basically she came to me to tell me that she wanted to do this and afterwards, if she could come back. I said to her to do what she feels what's best for her to do. There will always be a room for talents like her, so I kept it open. Hindi naman sinabing, ‘Ay, umalis ka, e!' Movie kasi talaga yung habol niya."
Matatandaang tinanggihan ni Lorna ang offer ng GMA-7 para sa isang role sa Sine Novela na Saan Darating ang Umaga. Si Lorna sana ang gaganap sa role na unang ginampanan ng yumaong aktres na si Ms. Nida Blanca sa pelikula. Si Lani Mercado ang pumalit sa kanya samantalang si Yasmien Kurdi naman ang gaganap sa dating role ni Maricel Soriano.
Mariing sinabi ni Ms. Wilma na hindi lahat ng mga artistang umalis sa poder ng Kapuso network ay malayang makakabalik. Dagdag ni Ms. Lilybeth, "Depende naman kung nagpaalam nang maayos. Kung minsan naman nagpapaalam nang maayos ‘yan."
Kung si Lorna ay nagdesisyong umalis ng GMA-7, ang aktres na si Sheryl Cruz ay nakatakda namang bumalik sa Kapuso network. Pagkatapos gawin ni Sheryl sa GMA-7 ang Mga Mata ni Anghelita ay lumipat siya sa ABS-CBN, kung saan gumawa siya ng ilang proyekto. Ngayon ay balik-GMA-7 siya sa pamamagitan ng isang malaking role sa upcoming series na Luna Mystica, kasama sina Mark Anthony Fernandez at Heart Evangelista.
"Yung kay Sheryl... Okay, this is what I know," simula ni Ms. Wilma. "Nagpaalam din naman ‘yan, e. Si Ate Dolor [Guevarra, Sheryl's manager] naman, nag-usap kami. Ang sabi niya, in the case of Sheryl, parang si Susan [Roces, Sheryl's aunt] yung nag-decide because Susan wanted Sheryl to do the Susan Roces Collection. Kung ano man yung naging resulta nun, hindi na natin yun papakialaman, pero ito lang yung pinanggalingan. So, paano ka naman makakahindi kung mismong ano ang magsasabi sa ‘yo na, ‘Do this first'? Sige, do it.
"Si Sheryl, with the projects that we did for her... Okay, ibalik pa natin further back. Nung bumabalik si Sheryl, I met Ate Dolor and Susan in a dinner. ‘Tapos, talagang lumapit siya at ibinilin niya si Sheryl. Sinabi niya that Sheryl has decided to stay...try her mag-TV ulit. Could I help her, sana alagaan. So, sabi ko, yes, and then we did. ‘Tapos maganda yung mga shows [na ibinigay sa kanya], maganda yung rating, nabalik yung career, in short.
"And then afterwards, ‘eto na yung sinasabi nila na ‘she had to do this kasi Susan Roces Collection. Gusto niya talaga ibigay kay Sheryl.' So, okay din, pero sinabi ko rin kay Ate Dolor... I never got to talk to Susan anymore, only to her [Dolor] and na-text ko lang si Grace [Poe Llamanzares, Susan's daughter]. Sabi ko sa kanya [Dolor], ‘I just want you to relay to Susan just to remind her that I did not fail her.' Pinasabi ko lang ‘yon, and it was fine, sumagot naman si Grace.
"Kung anuman yung resulta ng mga projects na ginawa niya [Sheryl sa ABS-CBN], history na ‘yon. Now, we know she doesn't have any projects... Meron talagang isang role na bagay talagang ibigay sa kanya [sa Luna Mystica]," lahad ng lady executive.
Naitanong din ang kaso ni Ara Mina, na umalis din sa poder ng GMA-7. Hindi direktang sinabi ng GMA-7 executives kung babalik na sa Kapuso network ang sexy actress, pero mamaya, September 28, sa SOP ay magge-guest si Ara para sa anniversary ng Regal Films. Ayon kay Ms. Wilma, maaari nilang hanapan ulit ng bagay na role para kay Ara, pero hindi pa raw ngayon.
Para naman sa mga nagtatanong na fans ni Jennylyn Marcado, tiniyak ng GMA-7 na may plano sila para sa pagbabalik ng kapapanganak na young actress. Sa isang taon ay gagawa siya ng Sine Novela, katambal ang dating ka-love team na si Mark Herras.
ON ANNABELLE RAMA. Hindi rin nakaiwas si Ms. Wilma nang tanungin siya kung kumusta na sila ng talent manager na si Annabelle Rama. Matatandaang nagkaroon sila ng alitan dahil sa pagsasabay ng first-day showing ng pelikula ng anak ni Annabelle na si Richard Gutierrez, katambal si KC Concepcion, ang For The First Time, at ang birthday concert nina Dingdong Dantes at Marian Rivera.
