Thankful ang award-winning actress na si Mylene Dizon na sa kabila ng kanyang pagbubuntis ay nabigyan pa rin siya ng project ng ABS-CBN. Ito ay sa pamamagitan ng primetime teleserye Tayong Dalawa, na magsisimulang ipalabas sa January 19.

"Mabuti nga kinuha ako ng ABS kahit na buntis ako, lalo na't kailangan kong kumayod para sa baby ko, ‘no!" bungad ni Mylene sa interview ng PEP (Philippine Entertainment Portal) sa launching ng Tayong Dalawa.  Nagmistulang awards night itong launching dahil sa pagbibigay-parangal sa award-winning cast ng naturang teleserye, Ito ay ginanap sa Teatrino sa Greenhills, San Juan last Wednesday, January 7.

Hindi ba siya binigyan ng follow-up project ng GMA-7 pagkatapos ng Dyesebel, kaya ngayon ay nasa ABS-CBN na siya ulit?

"Actually, I was still doing Dyesebel when they mentioned this [Tayong Dalawa] project already. And also the director of Dyesebel, si Don Michael Perez, mentioned na he wanted me to be a part of... I think it was Gagambino, but then I got pregnant nga."

Pero bakit pumayag siya sa Tayong Dalawa ng ABS-CBN?

"Dito kasi puwede akong bumirit, sa Gagambino hindi ako puwedeng bumirit!" biro ni Mylene. "So, I think nawala na yung character ko sa Gagambino. Pero hindi ko rin alam, e. Na-mention lang sa akin. I'm not actually even sure if it's Gagambino nga. He [Don Michael] just mentioned this new show after Dyesebel nga, na he wanted me to be in, e.

"But this one [Tayong Dalawa], noong nag-birthday ako last September dumating si Deo [Endrinal, business unit head ng ABS-CBN], tapos sabi niya, ‘O, anong plano mo?' Tapos sabi ko, ‘Hindi ko alam, Deo. Hindi ako ready. Ayokong magpahinga, ayoko!' Dedma lang itong si Deo, wala namang sinasabi sa akin. Aba'y biruin mo nga naman, may isini-secret pala itong si Deo! Hindi sinasabi sa akin! Pa-ngiti-ngiti lang siya noong gabing ‘yon. Yun pala that time, alam na niya ang plano niya sa akin."

BREAK FROM KONTRABIDA ROLES. Hindi ba maninibago ang mga tao sa kanya sa Tayong Dalawa dahil mabait ang role niya rito at hindi ang kinasanayan ng mga tao na kontrabida role?

"I played kontrabida kasi for a long time na, e," sabi ni Mylene. "Kapag nagso-soap ako, lagi na lang akong villain. It's very refreshing to start again a new soap wherein hindi ako yung laging galit. Pero it still requires a lot of hard work to be playing my role as Loretta [mother of Kim Chiu]. Nakakapanibago sa umpisa, pero I think ano lang naman ‘yan, e, habang nagga-grind yung taping, nasasanay na lang ulit ako, nakakapag-adjust na rin ako. I think both are very difficult. Kasi halimbawa, after this bigyan na naman ako ng role na nagsusungit, alam ko mahihirapan na naman akong bumuwelo diyan, e."

Paano yung shots para hindi mahalata ang tiyan niya, especially hindi naman buntis ang role niya sa Tayong Dalawa?

"Nagsusuot ako ng maluluwag na mga damit, mga polo. Buti na lang yung role ko rito ay hindi fashionista kaya puwedeng dukha-dukhaan. At saka dinadaan na lang sa mug shots, ganyan," ani Mylene.

Hindi ba siya nahihirapan sa taping?

"Ang mahirap kasi yung hindi pa rin nawawala yung puyat. Pero pinangakuan naman ako ng cut-off [time]. So, ito ngang mga past taping days maaga-aga na rin akong nakakauwi. And I get to rest naman sa taping. Ang mahirap lang is puro iyakan. Kasi nga yung role ko rito laging umiiyak. Ang role ko nga is Loretta, ang nanay ni Kim Chiu, na hindi marunong lumaban at iiyak na lang."

Hindi ba makakasama sa baby yung lagi kang umiiyak?

"Hindi naman. Kasi hindi naman yun ang tunay na pakiramdam ko as a person. Hindi naman yung tipong paggising ko, depressed ako, pagtulog ko, depressed ako. Actually, sa set, tawa lang kami nang tawa. Wala kaming ginawa kundi tumawa. Joke time nang joke time lang lagi. Iiyak lang sa eksena, and then pagka-cut, joke ulit. Pati si Tita Anita [Linda], dyino-joke namin," kuwento ng aktres.