Emosyonal ang direktor na si Cathy Garcia-Molina nang makapanayam siya kaninang umaga, March 30, nina Edu Manzano at Rica Peralejo sa Umagang Kay Ganda, ang daily morning show ng ABS-CBN.
Ang interview sa resident film director ng Star Cinema ang unang pagkakataon na nagsalita siya tungkol sa pagpanaw kahapon, March 29, ng kanyang asawa na si Philip "Epoy" Molina.
Sa panayam kay Cathy, kinumpirma nito ang balita na nagkaroon ng cardiac arrest si Epoy nang dalhin sa ospital dahil sa aksidente na nangyari sa Baguio City kahapon.
"Bale what happened, after... Kasi ano 'yon, e, race ng mountain bike, downhill. He left Friday [March 27] and then at 10:30 a.m. [yesterday, Sunday], yung isang medyo mataas na jump, masama raw yung bagsak niya.
"So at 11:30 a.m., I got a call from a friend saying na dinala na siya sa hospital at nire-revive. Medyo natakot ako kasi yung term was 'nawalan siya ng pulse rate' and then nire-revive nga.
"Then, I got a call again saying nag-react na yung katawan ni Epoy so, inex-ray na siya. And then the next thing I know, Tita Malou [Santos, managing director of Star Cinema] called me and 'yon, sinabi na I lost my husband already. That was about 2:30 in the afternoon," malungkot na lahad ni Direk Cathy.
Ayon pa sa salaysay ng direktor ng blockbuster hits na A Very Special Love at You Changed My Life ay hindi raw niya kayang harapin ang kanyang mga anak pagkatapos niyang malaman ang nangyari sa kanilang ama.
"I was with my kids nung nalaman ko yung news and because I thought magtatagal ako doon [sa Baguio City ], dahil I thought magiging okey ang asawa ko, iniwan ko yung mga anak ko dito sa Manila with my sister. Nakaalis na ako when I found out, and I don't think I'll be ready to face my kids."
Ano ang pinakamami-miss ni Direk Cathy sa kanyang yumaong asawa?
"His playtime with my kids," sagot niya. "When I called last night, yung panganay ko na three years old was looking for him. These are the moments na I dread, to face my kids. They are sleeping right now and I'm waiting for them to wake up and I pray to God that kayanin ko, kakayanin ko, kayang-kaya. He [Epoy] has friends. I have everyone who prays for my husband and for me. Thank you everyone...thank you."