Kilala si Gretchen Barretto sa pagiging matapang sa pagharap sa mga intriga sa kanya, pagiging prangka sa kanyang pagsagot at walang inuurungang tanong. Pero tila hindi kinaya ni Gretchen ang dalawa sa sampung matitinding tanong ng The Buzz co-host at manager niyang si Boy Abunda para sa "Tough Ten" segment ng naturang ABS-CBN showbiz talk show.
Naging rule na ng The Buzz para sa mga artistang sumasalang sa "Tough Ten" na kailangang sagutin lahat ang sampung tanong na ibabato sa kanya. Pero kahapon, March 29, Gretchen broke this rule nang hindi niya sagutin ang dalawa sa mga tanong na may kinalaman sa isang lalaking espesyal sa buhay niya, tungkol sa pagpapakasal, at sa magiging groom-to-be niya.
Bagamat hindi nabaggit ang pangalan ng lalaki sa kabuuan ng interview, alam naman ng lahat na ang lalaking ito ay ang kinakasama ni Gretchen na si Tonyboy Cojuangco, ang ama ng anak ni Gretchen. Mismong si Boy ay hindi napilit ang controversial actress-singer na sagutin ang dalawang tanong na ito.
Kapansin-pansin ang pagbabago ng mood ni Gretchen habang tumatagal ang pagtatanong mula question number 10 hanggang question number 1. At some point ng interview ay mangilid-ngilid ang luha sa mga mata ni Gretchen. '
COMPLICATED. Kung tutuusin, masaya pa ang naging pagbungad ni Gretchen na nag-guest nang live sa The Buzz para sa promo ng kanyang bagong album na Complicated under Star Records. Sa kauna-unahang pagkakataon nga ay ipinalabas sa The Buzz ang world premiere ng music video ng carrier single niya sa album, ang Barry Manilow original na "Ready To Take A Chance Again."
Nagbibiro pa siya bago sumalang sa "Tough Ten" na ipinakita ang tatlong versions ng kanyang CD na napapalitan ang photos niya sa cover depende kung ano ang type ng bibili ng CD.
"Kasi complicated ako kaya dapat tatlo!" pabirong bungad ni Gretchen. "We have three different photos para sa cover po ng aking bagong CD na Complicated under Star Records. Meron pong 12 photos na puwedeng ipagpalit-palit depende sa mood n'yo at kung ano ang favorite song n'yo. I have 14 songs in the album. It's already available in all leading record bars."
"Okay, we'll try our 'Tough Ten' to be not as complicated," sabi pa ni Boy.
At sinimulan na ni Boy ang matitiding pagtatanong sa "The Buzz Tough Ten."
Tough Ten Question No. 10: Ang tingin ng publiko sa iyo ay meron ka na ng lahat. Kung ikaw ay tatanungin ngayon, meron ka bang materyal na bagay na wala pa?
"Just the other day... Kasi parang hindi ako techie. Mahilig ako ngayon na kumuha ng photos. So binigyan ako ni Ana Abiera [former actress] for my birthday... It's a digital camera yung maliit parang kasing laki ng cell phone. Pero the other day, nakita ko yung friend ko na merong professional camera. Wala ako nun, Boy. Nagpaparinig pala ako dun!" natatawang wika ni Gretchen.
"Okay , pag-uusapan natin 'yan, Gretch," ani Boy.
"Yun lang yun? Madali lang pala," nakangiti pang sabi ni Gretchen.
"Habang tumatagal pahirap nang pahirap ito," paalala pa ni Boy.
Tough Ten Question No. 9: Gaano ka kayaman? How much are you worth?
"I'm priceless!" bulalas ni Gretchen. "Alam mo, Boy, there's a saying na malalaman mo lang ang halaga ng isang tao pag nawala na siya."
Gusto mo bang ipaliwanag pa iyan?
"Hindi ba, alam mo lang yung value ng isang tao pag wala na siya. Are you talking material? Malalaman mo rin yun pag namatay na ako!" sabay tawa nang malakas ni Gretchen, na ikinatawa rin ni Boy.
"Sa ngayon, ayokong magbilang," pahabol ng aktres.
Tough Ten Question No. 8: Tatlong lalaki...three men in your life na gumawa ng malaking impact sa buhay mo. Three men and why?
"Okay, noong 1988, 18 years old po ako noon. Ang ginagawa ko lang show noon yung GMA Supershow ni Kuya Germs [German Moreno]. Ang kinikita ko lang po noon ay P2,750 per Sunday. Hindi po iyon sapat para mabuhay ng isang linggo, hindi ba? Wala akong pelikula noon, naalala ko, nilapitan ko si Robbie Tan ng Seiko Films... Parang mahirap naman itong tanong na ito."
Patuloy niya, ""Nilapitan ko si Robbie Tan at humingi ako ng project na kung puwedeng gumawa ako ng pelikula. Ako mismo ang lumapit with Vir Mateo. And binigyan ako ng trabaho ni Robbie Tan at dahil doon nabuhay ko ang sarili ko. Nakamit ko ang mga pangarap ko sa buhay. So, Kuya Germs, Robbie...kasi hindi lang naman tatlo e. Ang dami ko talagang pinagkakautangan ng buhay.
"Uhmm... Boy, yung impact na nagawa mo para sa akin because I know that no matter what happens, puwede akong tumakbo sa iyo. Katulad noong natsismis na pinalayas ako sa bahay. Tinawagan mo ako at sinabi mo, 'You have a room in my house.' Masayang-masaya ako dahil ang ganda ng bahay mo.' Sabi ko, 'Okay, may room ako sa bahay mo.' That really means a lot. Isa pa, o tama na yung tatlo?"
Sumigaw ang audience sa studio ng isa pa sabay tanong ni Boy, "Sa ngalan ng pag-ibig?"
"Tama na, ayokong umiyak," pakiusap ni Gretchen.
Tough Ten Question No. 7: Ano ba talaga ang pag-ibig para sa iyo?
"Para sa akin, ang love para iyang crystal. Kailangan you handle it with care. Pangalagaan mo. When you take care of love, makikita mo mag-sparkle yun. But if you don't handle it with care, pag masyadong mahigpit ang hawak mo, pwede siyang masira. Pag nasira yun...when it breaks, you can't mend it anymore. That's love. And love is complicated."
Tough Ten Question No. 6: Ikaw na mismo ang nagsabi, why is love complicated?
"Pag yung sitwasyon complicated to begin with, nagiging complicated yung love. Kailangan kasi buo ang loob mo. Pag mahal mo ang tao, you'll really fight for it. You go for it."
Tough Ten Question No. 5: Kung may isang lalaki na sasabihan mo ng linyang "Don't say goodbye to me," sino siya at bakit?
Hindi nagawang sagutin ni Gretchen ang tanong. Nakatitig lang siya kay Boy. At parang sinasabi na, "Ayokong sagutin ang tanong." Muling inulit ni Boy ang tanong, pero ilang saglit ang lumipas ay hindi pa rin sinagot ni Gretchen ang tanong. At makikita mo sa kanyang mga labi ang tila pabulong na pagsabi ng "Ayoko."
"Okay, let's respect that," ang tangi na lang nasabi ni Boy.
Tough Ten Question No. 4: Gaano kahalaga sa iyo ang kasal?
Naging seryoso ang pagsagot ni Gretchen, "I live for the moment when I will finally say I do."
Tough Ten Question No. 3: I-describe mo nga sa amin ang iyong groom-to-be?
"He's talented!" sabay tawa ulit ni Gretchen na bumalik ang pagiging masayahin. "He sings. He's got a complicated life also."
Is he tall? Is he moreno?
"He's got a golden smile. He holds on even when I choose to let go."
Tough Ten Question No. 2: Kaharap mo si groom-to-be and you say to him one of the titles of your song from the album: "Tell Me"... blank?
"Can I use a different song?" tanong muna ni Gretchen, 'tsaka niya sinabing: "Now I do believe that even in the storm, we'll find some light. Knowing you're beside me. You ask me if there'll come a time when I'll grow tired of you. Never my love. No, never my love," maluha-luhang sagot ni Gretchen.
Tough Ten Question No. 1: This answerable by a yes or no. Natanong na ba sa iyo ni groom-to-be ang tanong na, "Gretchen, will you marry me?" Yes or no?
Sa pangalawang pagkakataon, hindi na naman sinagot ni Gretchen ang tanong. Muling tinanong ni Boy si Gretchen, pero hindi talaga napilit ang actress-singer, na kitang-kita sa TV screen ang pagiging seryoso ng mukha. Hanggang sa mag-thank you na lang si Boy at dumiretso na sa commercial break.