Kasama si Snooky Serna sa indie film na Dukot ng ATD Entertainment, na pinagbibidahan nina Allen Dizon at Iza Calzado. Gumaganap si Snooky rito bilang si Myrna, isang human rights leader.
Nagkaroon ng story conference ang Dukot noong April 27 sa Gerardo's restaurant sa Quezon City. Pagkatapos ng storycon ay nakausap ng PEP (Philippine Entertainment Portal) si Snooky.
Sa aming pakikipag-usap kay Snooky ay inilabas niya ang kanyang hinaing sa co-star niya sa pelikula, ang multi-awarded actress na si Gina Alajar. Ayon kay Snooky, na-offend siya sa ginawang biro ni Gina during their story conference.
Kuwento ni Snooky, "Kasi nung may kanya-kanya kaming time na tinanong, binigyan kami ng kanya-kanyang moment to answer. And then, parang we were asked about our reaction or yung desisyon namin bakit namin ginawa itong pelikula, anong stand namin, ganyan. Tapos, habang nagsasalita ako... I mean, aminado naman ako na rumolyo ako nang rumolyo, di ba? Pero parang uncalled for na... Nung dumating na sa part na... I don't know, actually, parang wala ngang sense yata, e, na bigla niyang pinasok yung... Saka regardless, e, sabihin na nating we were talking about... No, e, wala pa ring sense kasi we were talking about my role, di ba? Hindi naman pinag-uusapan dito yung personal life ko, e. Hindi si Snooky kundi yung papel ko. Tapos, biglang siningit niya [Gina], 'Oy, huwag male-late, huh! Snooky, huwag male-late!' Yun bang ang dami-daming tao, tapos nagtawanan.
"Sabi ko nga, kung gusto mong maging kuwela—sa utak ko lang naman—kung gusto mong naging nakakatawa... Siguro thoughtlessness lang yung sa kanya, immaturity on her part, huwag naman sanang... Sana pag-uwi niya ngayong gabi, ipinagdarasal ko naman na mapag-isip-isip sana niya na... Ate ko pa naman siyang naturingan all these years. And she's how old, 'no? Matanda na siya, she should know better na. Hindi naman tama siguro na magpahiya ka ng tao. You make me a laughing stock at the expense of you being kuwela. Hindi ako sold sa gano'n.
"Bigla siyang sumingit habang nagapaliwanag ako na para bang... Ang feeling ko, anong connection ng pag-late-late ko dun sa role ko?" tuluy-tuloy na pahayag ng aktres.
Magiging challenge ba para sa kanya ang sinabi ni Gina para hindi siya ma-late sa kanilang shooting?
"I'm so challenged," sagot ni Snooky. "Pero alam ninyo, ayokong magyabang, kapatid. Baka sabihin naman ng iba, 'Naku, napaka-self-righteous naman nito.' Pero it's all by God's grace pa rin. Ako, on my end, I will really try my best to do my homework talaga na... Siguro kung pupuwede lang pasampal ako sa mga anak ko sa gabi para makatulog ako nang maaga, para mawala ang insomnia. At para makapag-deliver ng tamang dialogue, kasi nakakahiya kay Allen [Dizon, producer of Dukot], kay Direk [Joel Lamangan]."
Anong message ang gusto niyang iparating kay Gina?
"Hindi, ang sa akin, ang feeling ko... Sabagay, sabi sa akin ni Tito Mario [Bautista, veteran entertainment columnist] kanina, 'Huwag nang ganoon, huwag kang sensitive.' Sabi ko, it's not being sensitive, or maybe sabihin na nating I am. It's because stigma na yun sa akin, e, nakakabit na sa akin yung pagong, late-late. And then, eto ako, nagta-try na magbago.
"And then, uunahan niya [Gina] ako, magbibigay na naman siya ng idea sa mga tao na, 'Uy, 'yan si Snooky, baka nakakalimutan ninyo, pagong 'yan, mali-late 'yan.' And I didn't get the point, why? Bakit kailangan pa niyang ipaalala sa ating lahat? It's so painful to me. It's not funny. Siguro sa ibang tao nakakatawa, pero sa akin na... Dun ako naapektuhan ng career ko, dun ako nasira. Ngayon, nagbabagong-buhay... Kumbaga, masakit sa akin yung joke na yun. Hindi siya funny.
"But then, ang reaction ko, we don't have to be friends. Marami kaming eksenang gagawin together. But then again, I don't care naman. Hindi sa nagyayabang ako, ha. But I hope and pray that I will have the resilience enough and the courage na huwag niya akong ma-intimidate. Kasi hindi ko naman siya planong awayin, e. Hindi ko siya planong laitin. Siya nga ang nanglait sa akin, e, in a way.
"So, ang sa akin na lang siguro, huwag na lang kaming magkibuan sa set, tutal, we don't have to be friends, di ba? We only have to act. We only have to be castmates, di ba?" pahayag ni Snooky.
At press time ay sinusubukan ng PEP na kunin ang reaksiyon ni Gina tungkol sa mga pahayag na ito ni Snooky.