Naglabas kanina ng official statement si Senator Loren Legarda tungkol sa binitiwang salita ng Hollywood actor na si Alec Baldwin bilang guest sa Late Show with David Letterman noong May 12.

Sa nasabing interview, sinabi ng ex-husband ni Kim Basinger na iniisip na niya na magkaroon ng asawa sa pamamagitan ng "Filipino mail-order bride."

"I think about getting a Filipino mail-order bride at this point, or a Russian one, I don't care...I'm 51," sabi ni Baldwin kay Letterman.

Ang pahayag na iyon ng Hollywood actor ay umani ng batikos mula sa mga Pilipinong nakapanood at nakarinig, kabilang na rito si Senator Loren Legarda.

Banat ng broadcaster turned senator, "Isn't it that when you order something, you pay for it? Thus, I say to them, Filipino women are not for sale, not even to Hollywood actors [like Baldwin].

"The practice of taking mail-order brides, aside from being illegal in the Philippines, is just one step removed from prostitution. Women in general should not be treated as commodities, to be ordered like fast food, or a pair of jeans to be discarded at the whim of the buyer. I condemn all forms of commoditization and objectification of women."

Humihingi si Senator Legarda ng public apology mula kay Baldwin dahil sa salitang binitiwan nito.

Sa bisa ng Republic Act of 6955 o Anti-Mail Order Bride Law, matagal nang ipinagbabawal ang ganitong practice sa Pilipinas dahil sa maraming bilang ng Pilipina na  nagdurusa dahil sa sistemang mail-order bride.

Ipinahayag ni Senator Legarda na hindi niya palalampasin ang anumang "demeaning characterizations" laban sa mga Pilipino, katulad ng paglalagay sa dictionary na "domestic helper" ang kahulugan ng salitang Filipina noong si dating Pangulong Cory Aquino ang nakaluklok sa puwesto.