Inamin ni Rhian na dahil daw sa intense na eksena nila ay nabukulan siya sa ulo minsan. May mga times naman na sariling kagagawan niya rin daw kung bakit siya nasasaktan.

"Minsan may pasa ako hindi dahil sa kanila kundi dahil sa sariling katangahan ko lang. May mga ganun na self-inflicted. Kunwari pag sinabing lumuhod, dina-drop ko talaga lahat ng weight ko sa tuhod ko. Tapos bigla ko na lang mararamdaman yung pain. Tapos pag tiningnan ko na yung tuhod ko, blue na siya. Ang cute nga ng kulay ng tuhod ko ngayon!" biro ni Rhian.

Kahit daw kay Jean Garcia, na gumaganap na stepmother niya, ay maraming beses na siyang nasaktan. Pero okay lang daw kay Rhian dahil bago pa nila gawin ang eksena ay nag-uusap sila.

"Actually, kung may pananakit na mangyayari, sinasabi talaga nila agad sa akin yung ano yung mangyayari. Kunwari si Ms. Jean, bago siya gumawa ng scene na mananampal siya, sasabihin niya agad, 'Uy, saluhin mo na lang, ha. Wag kang gagalaw baka magkamali pa ako ng ano.' Puwede naman dayain sana, pero hindi namin ginagawa. Hindi kami madadaya."

May pagkakataon ba nang sampalin siya ay parang nahilo siya?

"Meron, nakalimutan ko nga yung linya ko sa lakas ng sampal, e!" tawa niya. "Yung pinakaunang sampal ni Glaiza, dun ako nagulat. Nayanig ako. Pagsampal sa akin, parang hindi ko na maalala kung ano yung nakikita ko. Pero naaalala ko na hindi ko siya mahanap. Kasi yung tumakbo sa isipan ko pagsampal, pak! 'Nasaan si Glaiza?' Yung ganun. Yung bigla na lang akong hilong-hilo na parang, 'Nasaan ako, nasaan si Glaiza? Ay, eksena ko na pala! Ano ang linya ko?' Mag-iimbento na lang ako. Ganun."

Bagama't kontrabida raw ang role ni Glaiza sa soap, sa totoong buhay naman daw ay magkaibigan sila nito.

"Oo, naging textmates kami. Sobrang easy siya to get along with. Napaka-okay niya.... napaka-cool niya lang babae. So, I'm very happy na nakapag-form ako ng friendship with her." 

NEXT PROJECTS. Ano ang susunod niyang project after ng Stairway To Heaven?

"Right now, wala akong ine-expect na gagawin for TV after ng Stairway. Kasi nung pagkatapos ng Zorro, dapat breaktime muna ako. Kasi gagawa sana ako ng album at saka dalawang indie movies. So, dahil ginawa ko yung Stairway na-postpone yun. Hindi naman ako puwedeng gumawa ng album habang gumagawa ako ng drama kasi paos na paos ako lagi.

"Sa 2010 ay ie-emerge ko na ang sarili ko sa paggawa ng album. Utang ko pa rin yung dalawang indie film na yun, e. Yung isa heavy drama, yung isa love story siya na puwedeng pang-family. Never pa akong gumawa ng indie. So, first time kong mag-indie."

Upbeat naman ang concept ng album na gagawin niya under Bellhaus Entertainment.  

"Nagsimula yung album-album na 'yan kasi one time, nakita nila akong kumanta sa SOP. Sabi nila, puwede raw akong kumanta. E, ako ini-enjoy ko ang pagkanta. So, sabi ko, 'Sige, let's look into that.'"

Wish nga ni Rhian na magawa niya ang lahat ng projects na naka-lineup para sa kanya.