Ipinagdasal ng child star na si Robert "Buboy" Villar na makasama siya sa pelikulang Ang Panday ni Sen. Bong Revilla.

Kahit hindi niya napanood ang lahat ng Panday series ni Fernando Poe Jr. noong araw, naikukuwento raw sa kanya kung tungkol ito kanino at kung ano ang istorya nito. Kaya mula noon, ipinagdasal ni Buboy na sana ay makasama siya kapag nagkaroon ng panibagong Ang Panday movie.

"Opo, talagang dinasal ko din po na makasama ako sa Panday, e. Ikinukuwento po sa akin. Kaya sabi ko po, sana ako ang maging sidekick ng Panday, na sana makasama ako sa pelikula, na kapag nagkaroon ng Panday, ako ang maging sidekick," saad ni Buboy nang makausap siya ng PEP (Philippine Entertainment Portal) sa presscon ng Ang Panday kaninang tanghali, December 10, sa Enchanted Kingdom sa Sta. Rosa, Laguna.

Ano ang naramdaman niya nang matupad ang kanyang dasal?

"Masayang-masaya po ako na makakasama po ako ni Senator Bong," sagot ni Buboy.

Ikinuwento rin ng child star na noong una raw ay nahihiya pa siya kay Sen. Bong.

"Talagang nahihiya ako sa kanya kasi po... nahihiya ako kasi po senator siya, e. Pero habang po patagal nang patagal ang shooting namin at pabigat nang pabigat ang shooting namin, masasaya po lagi kami. Kaya nga po pag nagsu-shooting kami, parang hindi na kailangang mag-Christmas party dahil sobrang saya namin. Ganun po," kuwento niya.

Bukod kina Bong at Buboy, nasa Ang Panday rin sina Iza Calzado, Rhian Ramos, Geoff Eigenmann, at Phillip Salvador. Mula sa direksiyon ni Mac Alejandre, official entry ito sa 2009 Metro Manila Film Festoval.

INVESTING HIS EARNINGS WELL. Isa sa pinaka-in-demand na child actors ngayon si Buboy kaya hindi kataka-takang may mga naipundar na siya mula sa kanyang kinikita sa showbiz.

Nakabili na siya ng bagong sasakyan—isang kulay brown na Starex at may sarili rin na siyang driver ngayon. Hindi tulad dati na nagta-taxi lamang siya at kung minsan ay nakikisakay sa service vehicle ng GMA-7 kapag may taping.

Bukod dito, may sarili na rin siyang bahay na ang ipinambabayad ay galing rin sa kinikita niya.

Ang manager ni Buboy ay si Direk Maryo J. de los Reyes.

"Binilhan po ako ni Direk ng bahay kasi siya po ang manager ko. Dun na po kami nakatira ngayon, kami po ng pamilya ko," banggit ni Buboy.

SIDEKICK OF PANDAY & DARNA. Sinabi rin ni Buboy na nag-e-enjoy siya na marami siyang trabaho dahil gustung-gusto raw niya na nagsu-shooting at nagte-taping siya araw-araw. Bukod sa Ang Panday ng Imus Productions, Inc. at GMA Films, napapanood din si Buboy regularly bilang Ding, ang sidekick ni Darna na ginagampanan ni Marian Rivera.

Ano ang kaibahan ng maging sidekick ni Darna at maging sidekick ng Panday?