Isang pamilyar na kanta ni Yeng Constantino, "Hawak Kamay," ang narinig ng entertainment press na dumalo sa New Year get-together with the press na in-organize ni Senator Loren Legarda kagabi, January 13, sa Annabel's restaurant.
Binago ang lyrics ng kanta para umakma sa political jingle na gagamitin ni Sen. Loren sa kanyang kampanya sa muli niyang pagtakbo bilang vice president ng bansa sa May 2010 elections.
Nang ma-interview si Sen. Loren ng PEP (Philippine Entertainment Portal) at iba pang press ay kaagad niyang nilinaw na nabili na niya ang rights para sa naturang kanta. Kaya sigurado raw na hindi magkakaroon ng aberya.
"Binili namin yung rights ng 'Hawak Kamay' music na iaakma... na-change yung ibang lyrics na gagamitin ko. Siyempre, i-acknowledge natin lahat, yung creator, yung original song ni Yeng. Of course, binili natin yung rights ng song. Because it's a political jingle, inakma, we changed the lyrics, pinalitan, at merong ibang kumanta with the same tune, same song, but medyo iba yung lyrics," paliwanag ng senadora.
Naging isyu kasi sa pagitan nina presidential candidate Gilbert "Gibo" Teodoro at singer-composer Rico Blanco ang diumano'y unauthorized na paggamit ng likhang kanta ni Rico na "Posible" bilang political jingle sa TV advertisemet ni Gibo na napapanood sa telebisyon ngayon. (CLICK HERE to read related story.)
"Ako, we bought the rights and it's not very cheap," dagdag pa ni Sen. Loren.
Ayon sa senadora, magsu-shoot pa raw siya ng video, gamit ang "Hawak Kamay" para sa kanyang ilalabas na TV ad.
MOTHER LILY'S SUPPORT. Sa mga nakaraang eleksiyon, naging malapit si Sen. Loren sa entertainment press dahil kay Mother Lily Monteverde. Dahil alam ngang close sila ni Mother Lily, nakuha na ba niya ang suporta nito ngayong 2010 elections?
"Of course!" sambit niya. "Ayokong sumagot para kay Mother, pero siyempre, Mother and I, ang layo na ng aming pinagdaanan, ang dami na. And she's also having her own presscon for me. I'm sure, hihilingin ko sa birthday ko."
Open na kasi na supporter si Mother Lily ni Noynoy Aquino for president, nakasisiguro bang siya ang ikakampanya ni Mother for vice president?
"Of course, hindi lang siya... si Mother, si Father [Remy Monteverde], si Roselle [Monteverde-Teo, anak ni Mother Lily]. Sabi ko, 'Hindi ka puwedeng lumihis dahil ako ay anak mo.' Sabi niya, 'Siyempre naman, 'no.' Nakaukit sa puso niya 'Loren'. I think so. At pag lumihis siya, sumbong niyo sa akin! Hindi, joke lang. Love na love ako ni Mother e," biro ni Sen. Loren.
SHOWBIZ CRUSH. On a lighter note, natanong din si Sen. Loren tungkol sa mga crush niya sa showbiz.
"Oo, marami. Kaya lang, hindi rito, e. Si George Clooney at si Harrison Ford," sabi niya.
Sa local showbiz ba wala siyang crush, like sina Piolo Pascual, Sam Milby, Jericho Rosales, at Dingdong Dantes?
"Oo, lahat yun. Si Piolo kasi noong 2004, sinabi niya—hindi ko siya kilala noon, ha—tinanong sa kanya kung sino ang kanyang presidente at bise presidente noong 2004. Sabi niya, si Bro. Eddie [Villanueva] and Loren Legarda. That was six years ago, thanks to Piolo. Tapos yung nasa billboard ng Bench... si Dingdong."
Kukuha ba siya ng mga artista para mag-endorse sa kanya?
"If they endorse me on their own, iwe-welcome ko yun," sagot niya. "Pero kung ako ang kukuha, di ba, celebrity na ako? Hindi, hindi na siguro. Gaya ng sinabi ko, ang aking tema at porma ng aking kampanya ay humanitarian campaign—job fair, medical mission, tree planting, pakain sa mahihirap, ang focus yun. Siyempre may song and dance, pero parte na lang yun. Ang focus, humanitarian, Lingkod Loren, lingkod kalusugan, lingkod karunungan, lingkod kababaihan, lingkod edukasyon... Yun ang focus ng kampanya ko."
DOCUMENTARY BY BRILLANTE MENDOZA. Bukod sa mga ipinalalabas na short films at documentaries tungkol kay Sen. Loren at sa advocacies niya, may bago rin daw siyang gagawing documentary na ang magdidirek pa ay ang international award-winning director na si Brillante Mendoza.
"He's doing a documentary for me tungkol sa climate change," banggit ng broadcaster turned politician. "Nanalo siya recently sa Dubai, tapos first winner din siya [as Best Director] sa Cannes Film Festival.
"Alam mo kung paano kami nagkakilala? One day, he called me, he invited me sa kanyang premiere. Tapos hindi ako nakapunta. And then, nag-breakfast and lunch kami. Sabi ko, 'Bilib ako sa ginagawa mo as a Filipino, na na-recognize siya sa Cannes.' Tapos siya naman, 'Interesado ako sa ginagawa mo sa environment. Ano ba 'yang climate change?' Ipinaliwanag ko. Hanggang sa magsama kami at sabi niya, 'Gagawan kita ng documentary.'
"So, ginamit ko yung talino niya, yung adbokasiya ko. So, Filipino talents together. Hopefully, a documentary will see its way into Cannes. But important yung documentary niya ay makapagbigay ng awareness, kaliwanagan sa mga tao tungkol sa climate change," saad ni Sen. Loren.
Malamang ay matapos daw ang documentary sa birthday mismo ni Sen. Loren sa January 28, o kung di man ay February na raw.
GOLDEN GIRL. Speaking of her birthday, ano ang plano niyang gawin sa kanyang special day?
"Sa January 28, ako ay pupunta sa home province ko, sa Laguna. At doon ay may job fair, medical mission, tree planting-seeding mission. Pero siyempre, meron tayo na sarili natin. Siguro ang gagawin ko ay yung launching na rin ng documentary ni Direk Brillante on climate change."
Fifty years old na si Sen. Loren sa birthday niya. Feeling niya ba ay Golden Girl na siya?
"Golden na pala, pinaalala pa!" biro niya. "Okay, yung totoo, mukha akong ilan taon na? Pag sinasabi kasi ng mga tao, 'Hindi ka mukhang 50.' Oo, mukha ba akong 49? No, I just feel so blessed. Do I feel 50? Sometimes pag pagod. I can't pretend. I mean, I'm no spring chicken. Siyempre, pag pagod ka, ganun."
Ang isa raw na maipagmamalaki niya kahit na magpi-50 na siya ay ang kanyang hitsura. Aniya, walang tina o hindi siya nagpaitim ng buhok niya. Hindi rin daw siya nag-undergo ng botox or any beauty- enhancement medical procedure.
"Natural lahat 'yan!" bulalas ni Sen. Loren.
CLICK HERE to visit PEP's Election Watch section.