Kakagaling nina Carla Abellana at Geoff Eigenmann mula U.S. para sa isang show para sa mga Kapuso doon, at habang nandoon daw ay ginawa na nilang opisyal ang kanilang relasyon sa Knotts Berry Farm, isang theme park sa California.

"Ay, wow! Wala, hindi, 'noh!" napabulalas si Carla sa pagtanggi. "Wala po kaming time doon. Diretso kaming trabaho. Yung pahinga lang namin yung sa plane ride and we were asleep the whole time kasi nga diretso po kaming taping pagkadating namin dito.

"Kahit yung papunta dun, kasi gabi at that time so tulog kami, bagsak kami. Ito nga hindi kumain sa eroplano, e, kasi hindi siya magising ng flight attendant  kasi tulog na tulog, 'kakapagod," kuwento ni Carla sa PEP (Philippine Entertainment Portal) last Wednesday sa taping ng Sine Novela Presents Basahang Ginto ng GMA-7 sa 19^th East Bar sa Alabang.

Sana siya ang gumising para makakain si Geoff.

"Hindi, ayoko, naaawa ako, e, pagod yung tao."

MEETING PINOY SOAP FANS ABROAD. Kahit daw sa U.S., mataas ang ratings ng Basahang Ginto.

"Ay oo, nakakatuwa malakas ang Basahang Ginto doon. Kahit I think mga never nakapunta dito, alam nila. Nakakatuwa, super nakakatuwa.

"Kasi yung Knotts Berry Farm was the place of the show, it was the Kababayan Festival and GMA Pinoy TV was one of the guests so nandun kami to promote Basahang Ginto and ang crowd namin was mostly young adults, teenagers, ganun.

"Alam na alam nila yung show! Mga  Fil-Ams na hindi nagta-Tagalog, na hindi marunong mag-Tagalog, nanonood sila.

"And ang nakakatuwa dun, yung iba sa kanila alam nila yung kumpleto — Rosalinda, SRO Cinemaserye Presents Carinderia Queen, The Last Prince, lahat...

"Ang daming Filipinos doon. Nakakatuwa na hindi mo ie-expect na even all the way there people would still watch the show," kuwento pa ni Carla.

MICHAEL DE MESA AS TOUR GUIDE. Kumusta ang pagmi-meet nila ni Geoff with his dad na si Michael de Mesa?

"Na-meet ko po siya when he was here, second time doon. Maganda kasi siyempre iyon na yung bago niyang bahay, dun na siya nakatira, so at least siya yung nagsasabi sa amin na ito yung ano, ganyan. Siya yung nagga-guide sa amin."

Kung ano ang ipagagawa nina Carla at Geoff na bahay in the future kapag mag-asawa na sila?

"Hahaha, hindi! Pero nagkukuwento lang siya yung buhay doon, kung ano yung mga lugar-lugar, siya yung nag-ga-guide sa amin, nagtu-tour sa amin and it was nice na at least nagkita ulit sila, nagsama ulit sila ng daddy niya."