AWAY-BATI? Masaya rin si Dingdong sa mas papaganda at mas pataas na nakukuhang rating ng kanilang primetime series ni Marian na Endless Love. Kinumusta namin ang working relationship nila ni Marian ngayon dahil may mga naririnig kaming usap-usapan tungkol sa kanila.

"Okey lang, hindi naman perfect, pero okey siya," sagot niya.

Diniretso na naming itanong sa kanya ang nakarating sa aming balita na madalas daw silang away-bati. Totoo ba ito?

"Hindi naman maiiwasan," pag-amin ni Dingdong. "May time na oo. Wala namang perfect. Pero ang importante, hindi naaapektuhan ang trabaho. Wala namang perpekto. Hindi naman all the time, sang-ayon ka sa lahat ng circumstances. Maaaring nangyayari talaga yun, pero ang importante, hindi siya nakakaapekto sa trabaho at nagiging maayos din ang lahat."

Sa isang interview nila ni Marian noon, pareho nilang sinabi na ilang minuto lang halos tumatagal kapag nagkakaroon sila ng away o tampuhan. Hindi na ba ganoon ngayon?

"Ganoon pa rin. Hanggang ngayon, ganoon pa rin. Tahimik lang naman kami," nakangiti niyang sabi.

Paano niya ide-describe ang relationship nilang dalawa ngayon?

"Okay naman, it gets better and better," tugon ni Dingdong.

INTERNATIONAL MOVIE. Kinumusta rin ng PEP kay Dingdong ang international indie movie na ginawa niya, ang Dance of the Steel Bars. Kasama niya rito ang Hollywood actor na si Patrick Bergin (Sleeping With the Enemy) at kinunan ito sa Cebu Provincial Jail.

"Actually, wala pa rin akong detalyeng puwedeng sabihin kasi hindi pa tapos yung movie," sabi niya.

First international movie ni Dingdong ang Dance of the Steel Bars, how was it?

"Yung experience, sa totoo lang, wala siyang pinagkaiba sa ginagawa ko rito. Yun lang siguro, yung excitement ng marami, mas parang kitang-kita mo dahil karamihan do'n, parang first din nila. So, first din nila na makakatrabaho si Patrick. But most of the staff, like the crew, are mostly Filipino. So, ganoon din, pati mga co-actors ko, Pinoy rin.

"Si Patrick naman, e, very professional. Talagang pagdating niya sa set, alam niya ang gagawin niya. Naiintindihan niya ang lahat. Although, hindi pa rin siya aware sa kultura natin, may culture shock pa rin siya. Parang I was telling him, nag-e-explain sa kanya at naintindihan din niya later on, at na-break ang ice at naki-jell siya sa amin."

Sa tingin namin, isa sa aabangan kay Dingdong ay ang pakikipag-dance showdown niya with the Cebu inmates, na kilalang-kilala na rin all over the world.

Posible bang masundan ang paggawa niya ng indie film?