"Hindi pa ako handa sa panibagong commitment," ito ang sinabi ni Diether Ocampo nang makapanayam ng PEP (Philippine Entertainment Portal), sa presscon ng Sa 'Yo Lamang ng Star Cinema, na ginanap sa Dolphy Theater kamakailan.
Two weeks ago ay kinonfirm na ng dating girlfriend niyang si Rima Ostwani na naghiwalay sila, kaya kinumusta namin ang lagay ng aktor.
"Okey naman... Parang fate 'yan, e, kailangan mo talagang daanan. And what's good about it, we learned... Para sa susunod, ma-play mo na siya, di ba?" sabi ni Diether.
"DAPAT MAG-USAP." May mga nangyari bang pagkukulang kaya natapos agad ang relasyon nila?
"Wala, ano 'yan, e, kumbaga, lahat tayo may mga bagong challenges na hinaharap, e, and siyempre may mga bagay na hindi madali, di ba? Kaya dapat mag-usap. Maganda kasi napag-uusapan, e. Ang communication dapat ay very open. Kaya maganda na nagkakaintindihan kayo, kasi masakit kapag hindi, e. Kaya, mas maganda na mapag-usapan n'yo nang maayos para pareho kayong makapag-move forward," eksplika ng aktor.
After magsalita ni Rima sa The Buzz noong August 8, nagkausap na ba sila uli ng girlfriend of almost two years?
"Hindi, e. Nakapag-usap naman kami nang maayos bago pa lumabas yung wala na kami... Kaya maliwanag sa amin pareho yun at nagkakaintindihan kami."
Wala na bang way to save the relationship?
"Ah, kasi, ako naman hindi ko pinangungunahan ang puwedeng mangyari. Palagi akong nagdarasal na sana kung ano yung ipahihintulot ng Diyos, naka-ready naman ako roon. Kaya sa pagkakataong ito, inaano ko muna yung trabaho muna, dahil parang ngayon lang ako nakakabawi sa inyo, dahil matagal na panahon na hindi ako gumagawa ng pelikula. Utang ko rin sa inyo na mayroon din akong mai-contribute na magagandang pelikula na mapasaya ko ang mga tao."
Hindi ba niya nami-miss si Rima?
Nagpakawala muna ng malulutong na tawa ang actor bago sumagot. "Well, siyempre... Hindi naman ganoon kadali na parang kakalimutan mo na agad ang lahat. Parte na ng buhay mo na yun, e, parte na ng malaking bahagi ng buhay mo."
May sinabi siya noon na minsan lang siya magpapakasal. Totoo ba ito o posibleng magpakasal pa rin siya uli? Matatandaang nagpakasal sina Diether Ocampo at Kristine Hermosa noong 2004, pero nagtagal lamang ito ng one year and one month bago nag-file for annulment si Kristine.
"Actually, ayaw ko nang magbigay ng salita. Tao rin lang, tulad ng sinabi ko, hindi natin inaasahan, di ba? Maganda na mayroon kang nilu-look forward na ganoong eksena, lagi ko rin navi-visualize na eventually magkakaroon din ako ng sarili kong pamilya. Oo naman, kaya nga motivated tayo na magtrabaho dahil gusto mong bumuo ng sarili mong pamilya."
WEBSITE FOR THE PHILIPPINES. May mga blind items ngayon na parang siya ang tinutukoy na nakikipag-date na naman daw?
"Siyempre hindi mo maiiwasan na may makakausap kang ibang tao, hindi mo naman malilimit yung sarili mo," bungad na sagot niya. "Responsibilidad ko bilang may dinevelop kaming project, na para sa mga kababayan natin. Ito yung loqal.ph, parang isang venue sa website.
"Example, sa Novaliches, may mga establishment na, let's say restaurant na masasabi mong maipagmamalaki mo kung taga-Novaliches ka. With this loqal, puwede nilang i-upload lahat ng information sa establishment, whether services, produkto o kahit mga tao na gusto natin ipakilala. Ito yung venue, na gusto nating mabigyan sila ng opportunity na ma-discover yung mga ibang lugar o mga puwede nating ibahagi sa ibang kababayan natin.
"Ang laki kasi ng Pilipinas, ang daming magagandang lugar, at the same time serbisyo, na hindi natin alam. With this loqal na website, nabigyan ng pagkakataon yung ordinaryong tao para makilala ang galing o skills, at kung merong ipinagmamalaki tayong kapitbahay na hindi kilala, ito yung venue for that," paliwanag niya.
PRESTIGE PROJECT. Sa Sa 'Yo Lamang na mapapanood na sa September 1, katambal ni Diether si Bea Alonzo. "Mayroon kaming plot sa story namin kung ano yung pinagdaanan ng relationship namin, saan nagkamali, kung ano yung dapat naming buuin muli."
Sabi pa ni Diether, "Ang makikita mo rito, yung mature na Bea. Iba na yung pinagdaraanan niya sa buhay. Kumbaga, mas malaki na yung responsibility niya at makikita mo yung lalim."
Tampok din sa pelikula sina Christopher de Leon, Lorna Tolentino, Coco Martin, Zanjoe Marudo, at marami pang iba.
"Iyong mga hinahangaan mong actor dito, different generations, napagsama-sama rito sa malaking proyektong ito."
Hindi lang sa casting excited si Diether. For the first time ay makakatrabaho niya si Laurice Guillen bilang direktor. "So, alam n'yo naman, every time na gumawa ng pelikula si Direk Laurice, malaki at maganda talaga. Dapat talagang makita ito ng mga tao, at regalo na ito ng Star Cinema sa mga tao dahil sa kanilang anniversary."
Isang karangalan daw para sa kanya na makasama sa pelikulang ito. "Bihira ka lang makakatiyempo ng ganitong klase ng proyekto," saad niya.