Isang masaya at energetic na Bugoy Drilon ang sumalubong sa mga bisita sa kanyang 21st birthday celebration noong Linggo ng gabi, January 9, sa East Raya Gardens Clubhouse, Pasig City.

Noong January 1, o New Year's day, ang talagang araw ng kapanganakan ni Bugoy.

But through the efforts of the Bugoyzters Fans Club, led by Maricon Lim, nagkaroon ng isang birthday celebration si Bugoy kasama ang kanyang pamilya, mga kaibigan, fans, at ilang miyembro ng press.

Naroon noong gabing iyon ang nanay ni Bugoy na si Mrs. Myrna Bogayan at ang kanyang limang babeng kapatid na sina Mhabel, Emily, Jay, Almira, at Rosalie.

Pangatlo si Bugoy, o Jay Drilon-Bogayan, sa kanilang anim na magkakapatid.

"Ito ang pinaka-first na birthday party ko talaga na marami nag-attend. Kasi yung birthday ko dati... alam mo yung banana na may tinusok na hotdog? Yun na yung [handa namin]," ang sagot ni Bugoy nang makausap siya ng PEP (Philippine Entertainment Portal) at ng ilang miyembro ng press noong gabing iyon.

Masayang-masaya rin daw siya dahil nakasama niya ang kanyang pamilya na lumipad pa galing ng Camarines Sur.

"Happy ako kasi first time nila na maka-attend ng party na ganito.

"Dapat mag-e-Enchanted Kingdom kami, pero may trabaho po kasi si Mama ko kaya uwi sila bukas, nag-leave lang siya.

"Hindi ko talaga ine-expect na ganito na maraming tao, na may lechon. Actually, matagal na nilang gustong matikman ang lechon, so happy ako.

"Naiwan si Papa kasi walang magbabantay ng bahay," paliwanag ng singer nang hanapin ng press ang kanyang tatay.

Nagtatrabaho si Aling Myrna sa munisipyo sa kanila.

"Para hindi lang ako nagtratrabaho, para kahit po pati siya nakakatulong din sa pamilya namin," ani Bugoy, na siyang tumulong para makapasok ng trabaho ang ina.

Ano ang wish niya sa kanyang kaarawan?

"Siyempre, more work. Happy lang, simple lang. Basta may trabaho ako, masaya na ako," ang mabilis niyang tugon.