Pagkatapos ma-link kina Coco Martin at Sam Milby, bulung-bulungan naman ngayon ang balitang ang teen actress na si Julia Montes daw ang showbiz girl na binabanggit ni Enchong Dee na kanyang nililigawan.

Balitang madalas raw lumabas sina Julia at Enchong kasama ang ilan sa mga dating kasamahan sa defunct ABS-CBN youth-oriented show na Shoutout.

Kapansin-pansin din daw ang kakaibang closeness at sweetness na nakikita sa dalawa.

Ayaw mang kumpirmahin ng young actor na si Julia nga ang tinutukoy nito na nililigawan niya, very obvious naman daw ito sa kinikilos ni Enchong.

Sa panayam ng PEP.ph (Philippine Entertainment Portal) kay Julia last week, diresto naming tinanong ang young actress kung totoo bang nanliligaw sa kanya si Enchong.

"Napapanood ko sa mga interview niya na mayroon nga raw siyang nililigawan, pero wala naman akong right na sumagot dahil hindi ko kilala," sabi ng 16-year-old actress.

Hindi naman itinanggi ni Julia na totoong lumalabas sila ni Enchong, pero grupo naman daw sila.

May special treatment ba na ibinibigay sa kanya ang young actor?

"Kami ni Enchong, friends lang kami," diin ni Julia.

"Lumalabas kami pero grupo kami sa Shoutout, kasi nagka-work kami sa Shoutout before. Iba kasi talaga ang grupo namin dun, iba yung lalim ng friendship. 

"Never kaming umalis na kami lang, minimum na yung lima kami or anim. Grupo kami at walang special treatment kahit na kanino.

"Kung text naman, nagkaka-text-an kami, pero hindi na text na talagang text. 

"Siguro nagkakatanungan lang kami sa grupo, 'Nasaan na kayo? Nandito na kami.'"

Ayon kay Julia, wala pa sa isip niya ngayon ang magka-boyfriend.

Pero hindi raw siya nagsasara ng pinto, lalo't marami naman siyang nakikitang magagandang ugali kay Enchong.