Nakatakdang ilibing sa Sabado, December 10, ang singer-actor na si Roseo Jose Rosales—o mas kilala bilang RJ Rosales.
Ihahatid si RJ sa kanyang huling hantungan sa Pine Grove Memorial Park sa Kingston St., Minchinbury, Western Sydney, Australia, pagkatapos ng 10:30 a.m. Mass sa St. John XXIII Parish Church sa Stanhope Gardens.
Hindi pa nalalaman ang tunay na dahilan ng pagkamatay ni RJ dahil hinihintay pa ng pamilya niya ang resulta ng autopsy sa kanyang mga labi.
Sa exclusive interview ni Marie Rea ng Ang Kalatas—isang community-based newspaper para sa mga Pilipino na naninirahan sa New South Wales—sa ama ni RJ na si Roseo Rosales, Sr., sinabi nito na medyo matatagalan pa ang paglabas ng official Coroner's report.
Kinumpirma ng ama ni RJ na natagpuang patay ang kanyang anak noong Lunes, December 5, bandang 9:30 a.m., pero hindi na siya nagbigay ng ibang mga detalye.
Sari-saring mga tsismis tungkol sa sanhi ng pagpanaw ni RJ ang kumakalat mula pa noong Lunes kaya nakikiusap sa publiko ang kanyang ama na huwag mag-speculate habang hindi pa lumalabas ang official report ng Coroner's office.
Ikinabigla ng mga kaibigan at fans ni RJ ang malungkot na balita.
Hindi sila makapaniwala na papanaw sa edad na 37 ang Fil-Aussie singer-actor na naging mainstay ng ASAP mula 2001 hanggang 2004.
May pagkakataon pa ang fans at supporters ni RJ sa Sydney na makita siya sa huling sandali dahil bukas, December 9, 6 to 9 p.m., ang viewing sa kanyang labi sa Guardian Funeral Homes, Sunnyholt Road, Blacktown.