Ayon kay Ritz Azul, marami siyang blessings na dapat ipagpasalamat sa pagtatapos ng year 2011.
Mula nang napasali sa talent search ng TV5 Star Factor last year ay nagtuluy-tuloy na ang showbiz career ni Ritz.
Para sa tulad niyang baguhan, impressive ang mga project na ibinibigay ng TV5 kay Ritz.
Bida na agad siya kasama si Arci Muñoz sa Mga Nagbabagang Bulaklak, tapos ay sinundan agad ito ng isa pang soap opera sa TV5—ang Glamorosa.
Ayon kay Ritz, "Sobrang nagpapasalamat ako, unang-una sa Diyos sa mga biyayang ipinagkakaloob Niya at siyempre ang lahat ng ito ay sa Kanyang glory.
"Nagpapasalamat din ako sa mga sumusuporta sa akin, lalo na sa inyong mga press sa walang sawang pagtulong sa akin.
"And sa blessings na dumarating sa akin, parang inspiration ito sa akin para lalo pang pagbutihin ang trabaho ko."
Nakausap ng PEP.ph (Philippine Entertainment Portal) si Ritz sa Baliwag Grill, E. Rodriguez Avenue, Quezon City, last Saturday, December 10.
Patuloy ng young actress, "Maraming blessings na dumating sa akin ngayong taon, pero unexpected lahat, e.
"So, parang pakiramdam ko, parang ang hirap paniwalaan talaga na bigla na lang darating ang mga bagay na ganito.
"Kasi po from Bahrain, medyo may pera kami noon tapos biglang parang naging zero, e.
"So, mula noong bumagsak kami, itinatak ko sa isip ko na gusto ko kina Nanay at Papa na uupo na lang sila sa bahay at ako na lang ang magtatrabaho.
"Kaya lang, ayaw nila.
"Kaya ngayon po ay tulong-tulong kami talaga at nagpapasalamat ako na nakakatulong din ako sa aming pamilya.
"Nagpapasalamat talaga ako sa Diyos dahil alam Niya kung sino talaga ang bibigyan ng biyaya."
BREAKTHROUGH PERFORMANCE. Sa nakaraang Golden Screen TV Awards ng Entertainment Press Society (Enpress) ay pinataob o tinalo niya sa kategoryang Breakthrough Performance by an Actress ang mga tulad nina Andi Eigenmann at Jessy Mendiola, na mas maraming proyekto nang nagawa kumpara sa kanya.
Ano ang pakiramdam niya rito?
Sabi ni Ritz, "Hindi naman po pinataob...hindi ko naman po iniisip ang ganoon o yung naungusan ko sila.
"Ang inisiip ko, lahat naman kami ay parehas lang ng ibinibigay na effort.
"So, etong award na ito ay chance ko para maging inspiration.
"Actually, iniisip ko nga na pressure ito sa akin, na dapat ay galingan ko talaga yung work ko para patunayan kong karapat-dapat ako sa award na ito."
GLAMOROSA.Nagpapasalamat din siya sa mga kasamahan niya sa Glamorosa dahil sa walang sawang pag-alalay nila sa kanya.
Ani Ritz, "Sobrang nagpapasalamat ako sa mga kasamahan ko rito, bukod sa sobrang gagaling nila, sobrang babait pa nila.
"Talagang hindi kasi nila ako pinababayaan, tinuturuan nila ako...sina Lotlot de Leon, Alice Dixson, at Ms. Lorna Tolentino, ang gagaling talaga nila at madadala ka talaga sa husay nila, e.
"Pati po sina Kuya Zoren [Legaspi] at Kuya Tonton [Gutierrez], sobra talaga nila akong inaalalayan.
"Iniisip ko nga po, dahil mga sikat sila... Kasi ang unang impression ko, kapag sikat ang mga artista ay hindi ka nila papansinin lalo't baguhan ka lang.
"Pero hindi po, e, baligtad pala dahil napaka-supportive nila.
"Kapag kaeksena ko nga, like si Ms. Lotlot, sampalan scene, sasabihin niya sa akin, 'O, Bebe, heto na naman tayo.'
"Tapos tuturuan niya ako ng techniques para kapag sinasampal niya ako ay hindi ako masasaktan."
NEW KAPATID STARS. Excited din si Ritz sa pagpasok ng malalaking showbiz stars sa Kapatid Network, lalo na ang kanyang idolong si Sharon Cuneta na umaasa siyang makakatrabaho niya sa bakuran ng TV5 balang-araw.
"Hay naku, sobra!" bulalas niya.
"Sobrang excited po akong makatrabaho ang Megastar at si Ms. Nora Aunor.
"Pangarap ko pong makatrabaho talaga sila, yung malalaking artista... and sana po ako makasama ko rin sila.
"Idol ko po si Sharon, gandang-ganda ako sa kanya at madalas ko siyang mapanood noon.
"Kaya pinapangarap ko pong makita sana siya sa personal.
"Sa ngayon po ay hindi ko pa rin nakikita nang personal si Ms. Sharon, e.
"So, kung makakatrabaho ko siya, siguradong mai-starstruck ako sa kanya, dream come true po iyon sa akin.
"Pati po si Ms. Nora Aunor, sana makasama ko rin siya sa isang project," kinikilig na sabi pa ng batang aktres.
RITZ'S WISH FOR 2012. Nakabili na si Ritz ng kotse this year at umaasa siyang bahay naman ang maipupundar niya sa pagsapit ng 2012.
"Sana po sa pagdating ng 2012, magkaroon ako ng bahay dito sa Metro Manila.
"Pag-iipunan ko po iyon, kahit na ano.
"Hindi ko po alam kung condo o townhouse, basta kung ano lang po ang kakayanin ko," nakangiting wika niya.
Kasali rin sa wish ni Ritz para sa darating na taon ang magkaroon ng pelikula.
"Sana po ay magkaroon din ako ng movie next year," asam ni Ritz.
"Sayang po, hindi kasi natuloy iyong Hototay, dapat iyon ang first movie ko.
"Pero sana po ay matuloy, hindi ko po kasi alam at mahirap kasing magsalita, e.
"Excited pa naman ako na first movie ko ay makakasama ko si Ms. Nora Aunor.
"So, hopefully, matuloy po sana iyong project next year."