Kahit na tumatagaktak ang pawis, hindi pa rin nagpigil sa pagyakap ang nagtitilihang fans ni Rayver Cruz nang lapitan ng aktor ang mga ito sa kalagitnaan ng laro ng Star Magic Basketball team laban sa University of Manila All-Stars kahapon, Pebrero 23, sa University of Manila (UM) Gym sa Sampaloc, Manila.  

Naroon ang basketball team na binubuo ng ilang Star Magic male artists sa imbitasyon ng unibersidad bilang "treat" sa mga estudyante nito.

Bahagi na rin ng paghahanda sa selebrasyon ng ika-100 taon ng unibersidad sa susunod na taon ang aktibidad na ito.

Nilapitan ng PEP.ph (Philippine Entertainment Portal) si Rayver habang nagpapahinga ito at kinumusta kung ano na ang pinagkakaabalahan nito ngayon pagkatapos ng Reputasyon.

"Sa ngayon, wala pa. Sa ASAP lang muna.

"Busy rin sa negosyo, sa bar namin sa Parañaque," sagot ng nagpaunlak sa interview na si Rayver.

Sa ngayon daw kasi ay abala siya at ang mga kapatid niya sa pagpapa-renovate ng Kabooze, ang bar na pag-aari nila.

"'Pag nag-open na, mas okey yun," pagmamalaki pa ng 22-year-old na binatang aktor.

BASKETBALL SKILLS. Pinansin ng PEP ang tila humuhusay na paglalaro ng aktor sa basketball.

"Hilig din kasi namin, e. Saka laging may kumukuha sa amin na mga schools, mga probinsiya.

"So, siguro nasasanay din kami. Hilig kasi talaga namin ang basketball, e.

"Pero tingnan mo, o natatalo na nga kami dito. Tambak na kami, e!" natatawang turo ni Rayver sa scoreboard sa UM Gym kunsaan ginaganap ang basketball game.

Nakabawi naman kalaunan ang team nina Rayver nang humabol sila sa score sa bandang 3rd quarter ng laro at nagwagi laban sa UM All-Stars sa score na 102-97.

GUESTING IN SARAH G LIVE! Kinumusta naman ng PEP ang relasyon ni Rayver sa girlfriend na si Cristine Reyes.

"Okey naman. Okey kami. Going strong," sagot ng binata.