Alden Richards

Malaki raw ang hawig niya sa dramatic actor na si John Lloyd Cruz, ang tinatayang top matinee idol ngayon.

Pero pinatutunayan ni Alden na hindi lang ang dimples na mero'n siya ang pwede niyang gamitin para sumikat sa pinasok niyang mundo.

Halos lahat ay pumupuri din sa pag-uugali ni Alden. At ito ay makakatulong sa kanya para mas mapalapit sa movie press, na malaki ang tulong para mas umugong ang kanyang pangalan.

Idagdag pa na nasa kanya ang mga katangian ng isang leading man: matangkad, guwapo, at matikas.

Ang kanyang pagkapanalo ng Breaktrough Performance by an Actor mula sa Golden Screen Awards, para sa pagganap sa serye ng GMA-7 na Alakdana, ay patunay ng kanyang malaking potential bilang isang aktor. 

Malakas ang bulung-bulungang isa si Alden sa mga aktor na pasisikatin ng kanyang home network, ang GMA-7, sa 2012.

Mapapanood din siya sa ipapalabas na Ang Panday 2 sa darating na Metro Manila Film Festival.

Sarah Lahbati

Walang komokontra sa amin kapag sinasabi naming nagagandahan kami kay Sarah Lahbati. Lahat ay sumasang-ayon sa obserbasyong isa siya sa mga baguhang may magandang at maamong mukha.

Marahil ay ganoon din ang opinion ng kanyang home network, ang GMA-7, kaya siya pinagkatiwalaang magbida sa fantasy series na Kokak.

Puhunan ni Sarah, hindi lang ang kanyang mukha kundi ang kanyang husay sa pagkanta.

Matapos ang pagbibida niya sa isang palabas na umeere sa afternoon block ay handa na si Sarah para sa isang seryeng ipapalabas sa primetime.

Xian Lim

Ipinareha na si Xian Lim kay Erich Gonzales sa Katorse ng ABS-CBN, pero parang napag-iwanan siya ng kanyang leading lady sa pagsikat.

Nitong huli, saksi kami kung paano siya tilian ng fans sa nakaraang A Night to Give Back benefit concert ng Starmagic, na pinangunahan ni Piolo Pascual. Hindi lang kumanta kundi tumugtog din si Xian Lim ng keyboard.

Aminado si Xian na malaki ang nagawa ng pagpareha sa kanya kay Kim Chiu sa My Binondo Girl kaya siya mas nakilala. Pero ayon sa actor, naging matiyaga rin naman kasi siya sa paghintay ng tamang proyekto.

Sa mga hindi nakakaalam, si Xian ang nag-compose ng kanta na pinapatugtog tuwing may eksena sila ni Kim Chiu sa My Binondo Girl.

Unang pinangarap ni Xian na maging basketball player, pero hindi man ito natuloy, ang kanyang height ay asset pa rin sa kanyang pagiging matinee idol.

Isang matinding project lang next year ang kailangan ni Xian para mas umangat pa ang kanyang pangalan.

Angeline Quinto

Hindi nagtapos sa pagkapanalo ni Angeline Quinto sa singing contest na Star Power ang linyang “It’s her time to shine.”

Matapos ng kanyang tagumpay sa contest, sumabak na sa ASAP XV ang dating “talunan” ni Sarah Geronimo sa Star For a Night.

Naging pamilyar ang kanyang tinig dahil sa pagkanta ng theme songs ng ilang teleserye at maging ng station IDs ng ABS-CBN.

Naging platinum records ang kanyang Angeline Quinto  at Patuloy ang Pangarap albums.

Ngayo'y susubukan na niya ang larangan ng pag-arte sa pelikula, katambal ang isa sa pinakamainit na actor ngayon at crush pa talaga ni Angeline: si Coco Martin.

Ito ay para sa You Light Up My Life na ipapalabas sa 2012. 

Tinatahak ni Angeline ngayon ang career path na dinaanan ng kanyang idolong si Regine Velasquez at ni Sarah Geronimo, na parehong nag-cross over sa paggawa ng pelikula.

Walang dahilan upang isiping hindi papatok ang unang pelikula ni Angeline, bagama't gusto pa rin namin siyang magpatuloy sa pagkanta, gumawa pa ng maraming hit songs, at makapag-concert sa mas malaking venue gaya ng Smart-Araneta Coliseum.

Daniel Padilla

May pinagmanahan si Daniel Padilla kung talent at itsura ang pag-uusapan. May “angas” siya, na pwedeng-puwede sa bad-boy roles, gaya ng mga ginampanan ng kanyang Tito Robin Padilla.

Pero, may angking kaguwapuhan din si Daniel na pang-bida. Bagama’t nandiyan pa ang mga kasalukuyang tinitingalang leading men, unti-unti ay nakakagawa na ng sariling pangalan ang binatang aktor.

Mas marunong umarte si Daniel kung ikukumpara sa kanyang mga kapanabayan, kaya hindi katakatakang mas mauuna siyang sumikat sa kanila.

Mula sa Gimik 2010 at sa kasalukuyan niyang palabas na Growing Up, ka-loveteam siya ni Kathryn Bernardo. Konting tulak na lang at malayo ang mararating ng kanilang tambalan.

Julia Montes

Kung napapansin ninyo ay pinaghihiwalay na ng proyekto ang stars ng Mara Clara na sina Julia Montes at Kathryn Bernardo. Sa tingin ng iba ay nararapat lang ito, dahil kahit wala pang disiotso si Julia ay puwede na siyang isabak sa mature roles.  

Gaya ng ginawa kay Bea Alonzo.

Marami ang sasang-ayon kung sasabihin naming mahusay umarte si Julia Montes. Iba na ang lalim ng kanyang pag-arte kumpara sa mga artistang kanyang kaedad.

Opinyon ng ilan din na hindi bagay hubugin ang career ni Julia sa molde ng loveteam, bagamat epektibo pa rin naman siya bilang isang teener sa Growing Up.

Sa susunod niyang teleserye na Walang Hanggan ay ipinareha na siya kay Coco Martin, na kilalang-kilala na sa husay ng pag-arte.

Walang dudang hindi lang ganda, katawan, at tindig ang puhunan ni Julia sa larangang pinasok.

Balitang isang pelikulang maglulunsad kay Julia sa 2012 ang binabalak gawin para sa dalagang aktres, na talent ng Star Magic.

Derrick Monasterio

Sa lahat ng daluhan naming pagtitipon kung nasaan si Derrick Monasterio na kinailangang may pakantahin among the Kapuso Network tweens, ang binata ang isinasalang.

Kumpara sa noong una naming marinig kumanta si Derrick, kapansing-pansing mas kontrolado na niya ang kanyang boses at masasabing mas gumaling na ang binata.

Standout si Derrick among his co-actors sa Tween Academy dahil matangkad siya at di rin pahuhuli kung ang pag-uusapan ay kaguwapuhan. Yung tipo ni Derrick ang pwedeng bida na bagay rin sa character roles.

Taglay ni Derrick ang qualities ng isang leading man. Boyish at pang-matinee idol, if given the right breaks, mas uugong ang kanyang pangalan.

Isa rin siya sa napipintong pasisikatin among the young boys of GMA Artist Center.

Ritz Azul

Mula sa pagiging finalist sa Star Factor ng TV5, at eventually ay runner up kay Eula Caballero, napasabak na sa iba't ibang shows ang pambato to stardom ng Kapatid network na si Ritz Azul.

Nakasama siya sa Nagbabagang Bulaklak, at ngayon nga ay kabilang siya sa cast ng Glamorosa, na pinagbibidahan nina Lorna Tolentino at Alice Dixson.

Mas handa na sa mature roles si Ritz kumpara sa kanyang mga kasabayan dahil malaki siyang bulas at dalaga na nga kung titingnan.

Pangarap din ni Ritz na sumali sa isang national beauty pageant sa hinaharap.

Kristoffer Martin

Maganda ang rehistro ni Kristoffer Martin sa litrato at maging sa TV at pelikula. Walang dudang pang-matinee idol si Kristoffer, o sa madaling salita ay pangbida.

Sa Ikaw Lang Ang Mamahalin, kung saan ay katambal niya si Joyce Ching, makikitaan ang binatang aktor ng potensiyal para kilanling isa sa leading men ng kanyang panahon.

Gaya ni Derrick Monasterio, nakakakanta rin si Kristofer, na kung babalikan ay nagsimula naman talaga sa pag-awit. Matatandaang isa siya sa Little Big Superstar finalists noong 2007.

Yassi Pressman

Kumbinasyon ng Filipino at British blood ang nananalaytay sa tisay na si Yassi Pressman.

Hindi man kasingtunog ang kanyang pangalan kumpara sa ilan niyang kasamahan sa youth-oriented show na Tween Academy, sa kanyang partisipasyon sa katatapos na Time of My Life ay pinatunayan ng dalaga ang husay sa pagsayaw at sa pag-arte.

Nasa kanya ang qualities ng isang magiging big star kung maaalagaan. 

Enrique Gil

Marami ang ginulat ni Enrique Gil sa nakaraang Cosmo Bachelor Bash. Walang takot siyang nagpasilip ng konting pangiliti sa audience. Ayon sa mga nakadalo sa nasabing okasyon, pinakamalakas ang palakpak at hiyawan nang siya na ang rumampa.

Nakitaan ng potensiyal si Enrique sa kanyang pagganap bilang half-brother ni Sam Concepcion sa Good Vibes ng Kapamilya network.

Bagama't mukhang matinee idol, hindi takot si Enrique na gumanap ng character roles, gaya ng kanyang papel sa Bugoy, na pinagbibidahan ni Gerald Anderson.

Eula Caballero

Itinanghal siyang Star Factor grand winner sa TV5. Nasa cast siya ng Bagets: Just Got Lucky, at sumabak na sa drama sa pinagbidahang series ni Nora Aunor na Sa Ngalan ng Ina.

Mapapanood din si Eula sa pelikulang Yesterday Today Tomorrow, na pagbabalik-pelikula naman ng Diamond Star na si Maricel Soriano.

Masuwerte si Eula dahil kahit baguhan pa lamang ay nakakasama na niya ang mga establisadong artista.

Hindi gaya ng isa pang Star Factor product, si Ritz Azul, maaari pang hubugin si Eula sa pakikipag-loveteam at maaari pang ilagay sa pang-teens na palabas.