Gumaganap si Dingdong sa dalawang katauhan. Siya si Arlan.

Natatangi si Arlan sa lahat ng mga Sundo. Ang mga Sundo ang mga nilalang na sumusundo at naghahatid sa mga yumao na nasa pintuan ng langit.

Sa kuwento, si Arlan ay may pitak ng damdamin sa kanyang puso at madarama niya ang awa sa oras na susunduin na niya si Sharina. Hahayaan niyang mabuhay ang dalaga...

Subalit dahil sa paglabag ni Arlan sa kanyang tungkulin, papatawan siya ng isang matinding parusa—ang maging isang mortal.

Sasalin siya sa katawan ni Benjie, isang kriminal. Wala siyang pagkakakilanlan sa mundong kinagisnan ni Benjie, mahihirapan siyang makipagsapalaran sa bago niyang mundo, at pagdaraanan niya ang lahat ng hirap na nararanasan ng tao.

Si Jennica Garcia ay si Monica—ang mabait na kapatid at tagapagtanggol ni Sharina at ang maiiwang nobya ni Junic.

Hindi niya matatanggap ang pagkamatay ng nobyo at gagawin ang lahat para malaman kung sino ang salarin sa pagkamatay ni Junic.