Isa ang former beauty queen na si Maria Isabel Lopez na nasa original cast ng Working Girls—ang comedy classic at big hit noong 1984—na kasama rin sa modern sequel nitong Working Girls, na handog pa rin ng Viva Films, kasama ang GMA Films at Unitel Pictures.

Twenty-five years later, ayon na rin nga sa writer-director-line producer ng 2010 version ng Working Girls na si Joey Reyes, ito raw ay kanilang sort of "tribute" sa original director ng nasabing Viva classic, ang National Artist na si Ishmael Bernal.

Kaninang tanghali, April 14, sa grand presscon ng Working Girls sa Sapphire Ballroom ng Gateway Suites sa Cubao, present si Isabel, kasama ang isa pang orig sa cast na si Carmi Martin, with the lead actresses ng wacky sequel na sina Eugene Domingo, Ruffa Gutierrez, Jennylyn Mercado, at Iza Calzado. Hindi nakarating sina Cristine Reyes at Eula Valdes sa di pa malamang dahilan.

ISABEL'S BEAUTY SECRET. Sa open forum, natanong ng press si Isabel kung ano ba ang beauty secret niya at hanggang ngayon ay sexy at maganda pa rin siya at 50.

"Iba ang secret ko kay Carmi," sabi niya. "Sa akin kasi, every day, I go to the gym. I jump, I dance, belly dancing, everything... Every day, I dance. Lahat ng exercises, yung mga body-building weights...lahat yun, ginagawa ko.

"Plus, I take lots of supplements. I don't have vices, except working out.  No cigarettes, no drugs, no wine. Tapos, healthy attitude, low-fat diet, parang si Direk Joey Reyes, South Beach diet... "

VENUS UNCROWNED. Since former beauty queen din si Isabel, natanong ang kanyang opinion tungkol sa sinasabing "uncharitable" na pag-dethrone sa Bb. Pilipinas-Universe 2010 na si Maria Venus Raj kamakailan, desisyon ng Bb Pilipinas Charities, Inc. (BPCI) sa pamumuno ni Mrs. Stella Marquez-Araneta.

Naging isyu ang diumano'y discrepancy ng birth certificate ni Venus, upon investigation, as against sa naideklara nito nang magpa-screen pa lamang siya sa Binibining Pilipinas beauty pageant. Kinukuwestiyon din ang nationality nito.

Bilang Bb. Pilipinas-Universe title holder noong 1982, na naging kontrobesiyal din dahil nag-sexy raw siya na bawal sa BPCI, ano ba ang masasabi ni Maribel (palayaw ni Isabel) sa pinagdadaanang ito ni Venus?

"I salute Venus Raj dahil sa katapangang ipinakita niya," sagot niya. "Ang difference lang noong time ko, hindi ako binigyan ng option na resign or dethrone. Ang ibinigay lang sa aking option ay mag-resign.

"So, ngayon, I have all the opportunities para i-mobilize ang press that time. Na after na pinag-resign ako, nagpa-presscon agad kami ni Rudy Fuentes. So, that paved the way for me to start a very successful showbiz career.

"And I can only say this, ang Bb. Pilipinas Charities kasi under Stella Marquez-Araneta...alam naman nating napaka-elitista niya at napakamatapobre! Komo galing akong... Alam kong nasa teritoryo niya tayo ngayon, okey lang!" natatawang sabi ni Isabel nang maalalang sa Gateway Mall, na pag-aari ng mga Araneta, ginaganap ang presscon ng Working Girls.

Dagdag niya, "Gaya ko, galing ako sa rampa ng Gerald Peter models noon na minamata nila at di raw accepted. Ngayon, nakita natin ang isang Venus Raj na galing sa mababang...impoverished na pamumuhay.

"Talagang elitist kasi siya [Mrs. Araneta], e. Talagang ang dapat diyan, ang Bb. Pilipinas Charities ay hinawakan 'yan ng Pilipino, hindi ng elitistang banyaga! Hinihintay ko lang na mag-rest in peace si Stella Marquez-Araneta!" matapang na pahayag ni Isabel habang nasa presidential table.

After the open forum, nakausap ng PEP (Philippine Entertainment Portal) at iba pang press people si Isabel bilang follow-up sa mataray niyang pahayag against BPCI.