Kahit abala si Andrea Torres sa kanyang international movie na Pasional, naramdaman din niya ang epekto ng pandemya sa kanyang mental health.
“Meron din po lalo na nung hindi pa natin ma-pinpoint kailan siya matatapos. Nayanig talaga ang mundo at dumaplis din sa isip ko na it may never go back to how it used to be," ang sagot ni Andrea sa email interview ng PEP.ph (Philippine Entertainment POrtal) kahapon, June 24, 2022.
How did she cope with it?
“Una ko pong ginawa siyempre nagdasal talaga. Lahat ng worries ko binigay ko sa Itaas.
“Reading, listening and watching inspirational and self-help content also made a huge difference.
“Also yung support system. Kapit-kapit kayo ng mga mahal mo sa buhay.
"Maganda rin siyempre meron kang nakakausap para maiwasan yung pag-o-overthink.
“But it’s easier said than done. It’s really a process so you have to be kind to yourself and take it one step, one day at a time.”
ON THE SET OF INTERNATIONAL MOVIE
Ang kanyang upcoming movie with Argentine actor Marcelo Melingo ang pangalawang pelikula na nagawa niya sa ibang bansa.
Noong 2016, ginawa ni Andrea ang Cambodian film na Fight For Love.
Kumusta magtrabahong muli sa isang international movie? Ano ang malaking kaibahan ng isang foreign production sa isang local production?
Madetalyeng tugon ng aktres, “I feel incredibly blessed with the projects I’m given since last year.
"Talaga pong more than what I prayed for and imagined. Napakaganda po ng experience ko with them. Sobra po nila kong inalagaan on and off cam.
"Before leaving po, they asked me for a list of things that I need to make me comfortable at work.
"They also provided a trailer for me. Nakakatuwa po complete po siya with bed, bathroom, mini-kitchen, sofa.
“It also didn’t take time for us to bond. Preparations pa lang po palagay na ang loob namin sa isa’t isa.
"Ang ganda ng communication namin kahit na magkaiba kami ng language.
“Nag-heart-to-heart talk po kami ng director ko bago mag-roll, and we were pleasantly surprised that we had the same interpretation sa character ko at sa story.
“I gave my full trust in him. Sinabi ko talaga sa sarili ko magiging bukas ako sa lahat kasi alam kong maaaring may differences tayo sa paraan ng paggawa ng material."
Mas toned down sila sa pag-iyak at paggalaw.
Patuloy na kuwento ni Andrea, “Kung dito po ay heavy drama tayo at babad ang movements, doon po ang madalas na request sa akin ay 'no tears' and quick movements.
"So may adjustments po talaga. Pero ako po kasi, I make sure I always talk to my director.
“Kinaklaro ko po lagi saan nanggagaling at ano ang vision niya for the scene especially this one kasi siya rin ang nagsulat ng Pasional.
“Nagkaroon po ako ng realization na, ‘Ay puwede rin yung ganito naman na atake!’
“Maganda rin siya. Na-appreciate ko siya. So pakiramdam ko po nag-grow ako bilang artista, na naka-discover ako ng panibagong atake kumbaga."
Pinakuwento rin ng PEP.ph sa Sparkle artists ang plot ng Pasional, kung saan gumaganap siya bilang isang dancer.
Ano ang experience niya working with foreign actors and production team?
Lahad ni Andrea, “It’s a love story that happened in the most unexpected situation.
"Di mo iisipin na puwede silang ma-fall sa isa’t isa, pero iyon yung beauty nung film kasi kasama yung audience sa journey, kung paano sila mapapalapit sa isa’t isa.
“Nakakatuwa rin kasi may mga eksena na papalit-palit ang English and Spanish sila sa conversation.”
Ang mga banyagang nakatrabaho ni Andrea sa Pasional ay ang assistant director na si Nicolas Cacciavillani;, ang director of photography na si Gio Croatto; ang direktor na si Francisco D’Intino; ang producers na sina Luciano Croatto, Agustin Clerico ng Malevo Films of Argentina, at ang Filipino independent producer na si Noel Maximo. Co-producer ang GMA Films.