Masaya si Jeric Gonzales na mapapanood na sa Pilipinas ang pinagbibidahan niyang pelikula na Broken Blooms.
“Overwhelmed talaga ako, kasi ang tagal naming hinintay itong pelikulang ito na lumabas dito, and dami ng awards, di ba?
“Nanalo ito sa iba’t ibang international film festivals, pero first time ko siyang mapanood on big screen dito sa Pilipinas, na kasama lahat ng mga kababayan nating Pilipino.
"So natuwa ako sa reaction nila, kasi na-appreciate nila yung pelikula namin, kaya masayang-masaya ako, ayun grateful na nagawa namin yung pelikulang ito,” ang umpisang pahayag ni Jeric nang makausap siya ng PEP.ph (Philippine Entertainment Portal) sa special screening ng pelikulang Broken Blooms na pinagbibidahan niya.
IMBITADO ANG START-UP PH CO-STARS NA MANOOD NG BROKEN BLOOMS
Sa unang pagkakataon, nagpakita ng puwet si Jeric sa isang eksena ng Broken Blooms.
Handa ba si Jeric na makita ng kanyang Start-Up PH co-stars na sina Alden Richards, Yasmien Kurdi, at Bea Alonzo ang kanyang makinis na puwet?
“Oo naman,” ang tumatawang bulalas ni Jeric. “Dapat nga i-invite ko sila, e, kaso hindi lang nagka-ano sa schedule, siguro magugulat sila!”
Sa tingin ni Jeric, ano ang magiging reaksiyon ng tatlo?
“Siguro tawa nang tawa si Bea saka si Alden saka si Yasmien,” ang tumatawa pa ring sagot sa amin ni Jeric.
“Kasi hindi sila sanay na ganun yung gagawin ko, kasi sa Start-Up PH sobrang wholesome, e, tapos ngayon magugulat sila na nagpakita ako ng puwet.”
Inimbita rin daw niya si Boy2 Quizon na co-star din nila sa Start-Up PH.
“Yes, si Dos, pero may taping siya ng Seed of Love, kaya hindi siya nakapunta, pero very proud siya sa amin ni Royce.”
Nasa Broken Blooms din si Royce Cabrera (R), na co-star rin nila sa Start-Up PH.
international awards
Nagkaroon ang Broken Blooms ng world premiere sa Directors’ Week competition program ng Oporto International Film Festival sa Portugal noong Abril.
Ginawaran ito ng Gold Remi sa Houston International Film Festival sa Texas, at napagwagian ni Jeric ang pinaka-una niyang international acting award sa Harlem International Film Festival sa New York.
Big winner din sa Mokho International Film Festival ang Broken Blooms. Natamo ng pelikula ang Best Narrative Feature Film award, at ng director na si Louie Ignacio ang Special Jury for Director award. Nagwagi rin ang mga bida ng pelikula na sina Jeric at Therese Malvar ng Best Actor In An Indie Film at Actress In An Indie Film awards, respectively.
Sa Tagore International Film Festival naman, nakuha ng Broken Blooms ang Best Narrative Feature award. Kinilala rin sina Jeric bilang Best Actor, Jaclyn Jose bilang Best Actress, at Direk Louie bilang Critics’ Choice For Best Director. Tinanggap din ni TM Malones ang Best Cinematography award.
Napanalunan ni Jeric ang kanyang pang-apat na international acting award bilang Best Actor mula sa Montelupo Fiorentino International Independent Film Festival sa Italy nito lamang Hulyo.
At kailan lamang rin ay pinagkalooban ng Special Jury Award ang Broken Blooms sa 8th Brasilia International Film Festival sa Brazil.
Dalawang film festivals din sa India ang kumilala sa pelikula na sinulat ni Ralston Gonzales Jover.
At sa unang pagpapalabas ng pelikula dito sa Pilipinas ay umani ng papuri si Jeric sa Cinema 2 ng SM The Block nitong Sabado, December 3, 2022.
“Thank you, thank you,” ang bulalas ni Jeric nang sabihin sa kanya ng mga nanood na mahusay siya sa pelikula.
Ang bumubuo ng cast ng Broken Blooms ay sina Jeric, na gumaganap na massage therapist na si Jeremy; Royce, na gumaganap bilang si Romy na isang macho dancer/callboy; Therese bilang si Cynthia na asawa ni Jeremy; at Jaclyn bilang si Jocelyn na ina ni Jeremy. Kasama rin sina Norman "Boobay" Balbuena bilang si Buday na gay salon owner na may pagtingin kay Jeremy, Lou Veloso bilang si Lolo Marco na lolo ni Romy, at Mimi Juareza.
Ipapalabas ang Broken Blooms sa December 14, 2022. Ang producer ng Broken Blooms ay si Engr. Benjamin Austria ng Bentria Productions, at ang line producer ay si Dennis Evangelista.