Napuno ng saya at pasasalamat ang pamamaalam ni Judy Ann Santos bilang guest host ng morning talk show na Magandang Buhay.
Noong June 21, 2022 nagsimula bilang guest host si Juday sa Magandang Buhay nang palitan nito pansamantala si Regine Velasquez-Alcasid na naghahanda noon para sa Iconic concert nila ni Sharon Cuneta.
Read: Judy Ann Santos returns to TV via Magandang Buhay
Sa Instagram account ng naturang programa noong Sabado, July 23, 2022, ipinost ang video ng huling araw ni Juday sa Magandang Buhay kasama ang kanyang mga co-host na sina Melai Cantiveros at Jolina Magdangal.
Sa video ay ikinuwento ni Juday kung gaano siya ka-excited at kasaya na maging parte ng programa.
Aniya, “Sa totoo lang, nung tinanong nila ako kung puwede akong mag-guest co-host, nandoon naman talaga yung initial reaction na excited ako pero parang mas nangibabaw yung nerbiyos.
“Kasi, parang ilang taon na akong hindi nagla-live show. Tapos, hindi rin naman talaga ako host. Tapos, morning show siya.
"Though naggi-guest ako sa Magandang Buhay, iba kasi yung guest, iba yung host ka.
“So, alam kong iba yung responsibility na iyon.”
Ayon pa kay Juday, malaking tulong ang kanyang mga kasamahan at ang mga nagiging guest ng programa kung kaya’t madali siyang nakapag-adjust at naging komportable.
“Napaka-welcoming kasi nilang lahat. Napakakomportable ng stint ko rito sa Magandang Buhay.
“Ang sarap makipag-usap sa mga guest. Ang saya ng set. Ang gaan ng trabaho.
“Matagal man akong hindi lumabas sa TV, ang bilis kong kumalma. Ang bilis nila akong naalalayan. Hindi ako pinabayaan ni Melai, hindi ako pinabayaan ng staff, ni Jolina.
“Nakaalalay talaga sila sa akin kung paano, kung saan galing yung mga guest, ano yung history nila, kasi wala rin naman akong alam.”
Pag-amin din ng tinaguriang Reyna ng Teleserye, ibang-iba ang morning talk show sa kanyang dati at naunang mga project kaya naman na-enjoy niya ang kanyang pagtatrabaho.
Paglalahad ni Juday, “Ang sarap magtrabaho kung yung setting ay ganito, yung masaya lang, walang stress.
“Gusto mo talagang pumasok kasi alam mong uuwi ka nang nakangiti. Yung alam mong pagod ka pero ang saya mo, napagod ka sa kakatawa.
“Parang minsan lang kasi mangyari iyon, madalas kasi napapagod ako sa pag-iyak.”
Sa kanyang huling araw sa programa ay bumuhos ang pasasalamat ni Juday sa ABS-CBN sa ibinigay sa kanyang tiwala na maging guest co-host.
Mami-miss daw niya ang kanyang mga co-host, staff, at lahat ng mga kanyang nakasama.
Dagdag pa niya, “At sa lahat ng mga momshies na nanood at tumutok, maraming-maraming salamat po.”
Kahapon, July 25, bumalik na si Regine sa kanyang hosting stint sa Magandang Buhay.