Biniro ni Luis Manzano, 41, si Mavy Legaspi, 21, kaugnay ng naging sagot ng huli sa isang tanong sa GMA-7 game show na Family Feud.
Isa sa si Mavy sa celebrity players sa November 23, 2022 episode ng daily game show na hinu-host ni Dingdong Dantes.
Sa jackpot round, sumalang si Mavy at sinagot ang mga tanong ni Dingdong.
Unang tanong ni Dingdong: “Kapag nagbibiruan, anong kalokohan ang isinasagot ng friend mo kapag tinanong mo siya n, ‘one plus one [1+1]…’”
Sagot ng anak nina Carmina Villarroel at Zoren Legaspi: "Hotdog."
Ang video clip na ito ay kumakalat na ngayon sa social media.
Mixed ang reactions ng netizens at lumalabas na generational gap ang ugat ng usapan.
Ayon sa iba, makukuha raw ng older generation ang joke. Ang karaniwan kasing sagot sa naturang tanong, base na rin sa lumabas na survey, ay “Magellan.”
Pero may Gen Z netizens naman ang nagkomentong hindi sila pamilyar sa joke.
“Hotdog” o “hakdog” ang karaniwang isinasagot ngayon ng young generation kapag hindi nila alam ang sagot sa tanong.
LUIS TEASES MAVY
Nakuhang pagtawanan ni Mavy ang sarili dahil sa kanyang sagot na "hotdog."
Reaction ng Kapuso young actor: “Feeling ko lang proud na proud mga magulang ko. maliit na bagay! Ako lang toh…”
Pero hindi pinalampas ni Luis ang pagkakataong mag-comment.
“Kinabahan ako, akala ko ako naglalaro,” tweet ng Kapamilya host, kalakip ang video clip ni Mavy.
Hindi nag-elaborate si Luis kung ang nais niyang ipunto ay kahawig niya si Mavy o dahil sa binitawang sagot ni Mavy na nakakatawa.
Si Luis ay kilala sa kanyang humor kahit sa social media.
Sumagot si Mavy ng “weary face emoji” at naka-tag si Luis.
Animo’y nais ipunto ni Mavy na mas lalo pang nadiin ang kanyang maling sagot sa game show dahil sa gatong ni Luis.
Ang screenshot ng kanyang sagot kay Luis sa Twitter ay ipinost ni Mavy sa IG Story.
Dagdag pang komento ni Mavy kay Luis: “Thank you nalang sa lahat kuya @luckymanzano…” at may kalakip pa ring weary face emoji.
Mahihinuhang nagkukulitan lang sina Luis at Mavy dahil sa blooper ni Mavy sa Family Feud.
Sa mga hindi nakakaalam, si Luis ay naging host din ng Family Feud, mula 2016 hanggang 2017, noong nasa ABS-CBN ang franchise ng game show na ito.