Ang dapat na birthday trip lang ng StarStruck V alumna na si Diva Montelaba sa Amerika ay tumatagal na ng mahigit isang taon.
Umalis siya noong January 2022, at ngayon ay nasa Virginia, USA, kunsaan marami rin daw mga Pinoy.
“Sobrang laki ng Filipino community rito na may mga nakikilala akong kapitbahay ko pala dati sa hometown ko sa Cebu. Classmate ko pala ang anak nila.
"Kaya parang hindi rin ganun kalungkot kasi ang dami kong nakikilala,” kuwento ni Diva nang makausap siya ng Philippine Entertainment Portal (PEP.ph) sa pamamagitan ng Zoom.
Nagtanong pa si Diva kung matatawag na bang “midlife crisis” ang nangyayari sa kanya sa edad na 32, kung saan may hinahanap siyang bago na iba sa nakasanayan na niya.
“Midlife crisis na rin ba ang tawag dun?" pakli niya.
"Yung parang I need a new environment. Since I’ve been doing one job ever, which is showbiz, parang I felt like I need something new.
“I chose to stay here muna because I’m having fun.
“Ako, sa nakakausap ko sa mga family ko diyan, medyo nahihirapan sila in terms of work, bilihin, and everything.
“And since I’m here, I’m gonna take advantage of it and then bahala na.
"Nandun ako sa phase na hinahayaan ko lang ang life kung saan niya ako gustong dalhin.
"And now, it felt right that I do stay here. And I do shows here.”
Nitong nakaraang weekend ay nagkaroon daw sila ng show ng singer-comedienne na si Gladys Guevarra, at nakasama rin niya ang singer na si Carol Banawa sa isa pang show.
Diva with Carol Banawa
Sabi ni Diva, “Mga paganun-ganun lang. So, kahit nami-miss ko rin ang acting, I still love performing.
"So, may pasundot-sundot na something I love. Hindi naman sobrang sad, fun pa rin."
THIRTEEN YEARS IN THE INDUSTRY
Si Diva ang First Princess o first runner-up sa reality-based artista search ng GMA-7 na StarStruck V noong 2010, kunsaan sina Sarah Lahbati at Steven Silva ang itinanghal na Ultimate Survivors.
Read: Steven Silva and Sarah Lahbati declared Ultimate Survivors of StarStruck V
(From left) Enzo Pineda, Diva Montelaba, Rocco Nacino, Sarah Lahbati, and Steven Silva
Labintatlong (13) taon na si Diva sa industriya.
Sa loob ng panahong iyon ay nakagawa siya ng halos 30 teleserye sa bakuran ng GMA-7. Ang pinakahuli ay ang Beautiful Justice noong 2019.
Kapag binabalikan niya ang mga nagdaang taon, paano niya ina-assess ang naging career niya? May regret o may pagmamalaki?
Pahayag ni Diva, “When I think about it, automatic ako na kapag ina-assess ko ang thirteen years na yon, palagi akong nagsisimula kung saan nagsimula ang lahat, which is StarStruck.
“Every time I think about the journey, parang wala akong ibang maramdaman kung hindi saya sa opportunity.
“Kasi, alam ko na maraming gustong mag-artista. Millions of people would want to have a spot in showbiz.
"And to be given the chance, parang ang grateful ko sa GMA. Kasi, I was very shy back then. Nag-join lang talaga ako sa StarStruck without knowing that I’ll be doing that kind of work for the next thirteen years.
“And then, naisip ko rin ang mga shows na sobrang nagustuhan kong gawin. Roles that I did and especially the people that I worked with on and off-cam. Yung mga idols ko, nakatrabaho ko.”
Patuloy niya, “Hindi siya 100 percent perfect because there’s no perfect in any kind of profession. May mga chismis, may mga nakaalitan, alam mo yun?
"It wasn’t perfect, but to top it all, sobrang mas mataas ang percentage na ang dami kong natutunan.
“Sobrang sayang memories na nagawa ko sa thirteen years na yon. I did everything— I danced, I sing, I act. Nabigyan ako ng opportunity to travel all over the world to perform.
"Sobrang ang grateful ko lang na parang, 'Shocks, nakatagal ako ng thirteen years!' It wasn’t easy lalo na kung paano ang showbiz ngayon, it’s evolving. When social media comes in, ang hirap mag-keep up.
“Tapos, nandito pa rin ako... well, I’m resting right now but I’m spending those years na nabibigyan pa rin ako ng show kahit paano. Sobrang meaningful ng journey na yon.”
NO EXISTING CONTRACT WITH GMA-7
Sa ngayon, walang existing contract sa GMA Network si Diva. Bago pa raw siya umalis papuntang U.S., natapos na niya ang kontrata niya.
Diretsahang tinanong ng PEP.ph si Diva kung sa pagbabalik niya, sa GMA-7 pa rin ba niya gustong lumabas?
Ayon kay Diva, “So far, GMA has been very good to me ever since, until now. And meron akong delicadeza na if not for them, I wouldn’t be here right now.
“So, hindi naman ako nagko-close door. Also, I wanna do indie films, theater. Not necessarily TV lang.
"So, I’m guessing, I’m gonna be doing different kind of TV or networks or management. Depende kung TV ba or big screen. Kung nasaan ang opportunities. Hindi naman ako mapili, ever since.
“And now, that’s a good thing, I guess. If you can’t have an exclusive contract, you can have this opportunity coming from different kind of management or networks.”
Alam ni Diva na sa loob ng 13 taon, hindi niya naabot ang tinatawag na “superstar status.” Pero inamin niyang pinangarap niya ito noong nagsisimula pa lang siya.
“Parang siyempre sa akin, sa first couple of years, kapag bagong artista ka, inaasam mo yung ganung klase ng status, sino ba naman ang hindi?
"Pero siguro, the reason why I entered show business was really to earn money for my family because I was a breadwinner. So, yun ang pinaka-number one goal ko.
“Siguro, sumunod na lang yung I wanna reach this kind of level. Pero dahil nga sumunud-sunod yung shows ko, nagiging fulfilling yung pakiramdam na palagi akong kontrabida, enough na sa akin yung mga directors appreciate me and nagagalingan sila sa akin. My colleagues, nagagalingan sila sa akin.
"Parang nakakaano na yun sa ego ko and nakaka-proud sa sarili ko, and for the longest time na ginagawa ko siya.
“I’m just grateful na nandito pa rin ako and hindi siya nakakababa ng self-esteem ko, if tingin sa akin ng mga tao I’m not the superstar. I don’t care actually.
"As long as I have work and magaling ako sa ginagawa ko at gusto akong kunin ng mga production because I’m good at it, enough na sa akin.”
WHERE LOVE IS...
Hindi itinanggi ni Diva na isa sa rason kung bakit masaya siya at nagdesisyong mamalagi muna sa Amerika ay dahil nandoon din ang kanyang boyfriend.
“I’m happy, I’m with my partner here right now,” sambit niya.
Taong 2013 pa raw sila magkaibigan ng kanyang boyfriend, pero na-develop daw sila.
“It’s sort of I’m in a relationship with my best friend, literally,” sabi ni Diva.
Sa ngayon, ayaw raw niyang magplano kaya hindi niya masasagot kung papunta na sila sa kasalan.
“Sabi ko nga, my whole life, pinaplano ko lahat ng bagay. Kasama siguro to sa midlife crisis na noong birthday ko, sabi ko, I wouldn’t plan as much. Kasi, nakaka-stress magplano and long-term.
“Kaya siguro ang stressed ko before kasi, I want everything to be exactly how I planned it.
"So ngayon, I want to take a different strategy in life, which is live in the present. Kung masaya ka ngayon, enjoy it as much as you can."
Tulad ng ibang Pinoy celebrities, gusto rin daw subukan ni Diva na maka-penetrate sa Hollywood.
“For now, since I can stay longer, I’m a resident now, I wanna pursue entertainment still. That’s why I’ve been doing concerts.
"I’ve met Rob Scheneider and he’s gonna hook me up with possible shows and Hollywood maybe."
Diva with Rob Schneider
Dagdag ni Diva, “And also, I’m planning to audition in short films here, gigs, concert, every now and then. Hindi ko kayang ma-deattach sa entertainment heart ko, kasi it’s always gonna be in me.
“I love people. I love show. I love interacting with people but I also need to face the fact that since I’m staying here, that entertainment goal wouldn’t be easy. So, I also need to find a job.
“I might pursue my dream. In the first place, bago ako mag-artista is to be a flight attendant. So, maybe I’ll do that.
"Here, it’s easy to find job here basta masipag ka lang talaga. Lalo na dito sa area ko, sobrang daming trabaho rito, basta hindi ka lang mapili.”