Nagbigay ng reaksiyon ang TV-movie director na si Mark A. Reyes kaugnay ng mixed reactions ng fans ng 1970s original animé series na Voltes V sa live-action series ng GMA-7 na Voltes V: Legacy.
Sa darating na Mayo 8, 2023, ipalalabas na sa GMA-7 ang big-budgeted at live-action adaptation ng animé.
Maraming taon ang ginugol at malaking halaga ang inilaan ng Kapuso Network para sa pinakaaabangang TV adaptation ng popular animé series.
Tanggap ni Direk Mark na hindi lahat ay positibo ang reaksiyon sa live-action adaptation ng Voltes V.
Gayunpaman, kumpiyansa ang batikang direktor na nasa right track ang Kapuso network.
Aniya, maipapakita nito ang kakayahan at husay ng Pinoy pagdating sa pagpo-produce ang world-class program.
Matatandaang naging trending ang Voltes V: Legacy trailer nang ipalabas ito noong January 2022.
“The mega trailer really went crazy, no. We were getting reaction videos from Japan, the U.S., and several other nations. It’s not only local but worldwide,” simula ni Mark sa press conference na ginanap sa SM The Block, sa Quezon City, nitong April 18, 2023.
(L-R) Voltes V: Legacy main cast Radson Flores, Ysabel Ortega, Miguel Tanfelix, Direk Mark Reyes, Matt Lozano, and Raphael Landicho (forefront).
CRITICS OF VOLTES V: LEGACY
Ayon kay Direk Mark, nakakabasa rin siya ng mga komentong hindi pabor sa live-action adaptation ng iconic animé robot hero.
“There are other reactions, the not-so-kind [like], ‘Ay, kaya ba nila yan? Baka mamaya pangit lumabas yan,’ stuff like that.
“That can’t be denied naman. It’s part of the world right now."
Katuwiran ni Direk Mark, kung hindi ito uumpisahan, kailan pa?
“We’re at the point that if we don’t do it now, and no one starts this in the Philippines, trying to be ambitious, and do this thing, this level, when will we start?
“Madaming nagsasabi na gusto nating lumevel up, improve. So, ito na.
“Ito na yung pruweba—na ginastusan to, pinag-isipan, pinagtrabahuan, pinaghirapan. Eto na po.
“That’s why you cannot tell us not to do it kasi may mga nagsabi, ‘Dapat hindi niyo na ginawa yan.’ No! Kailangan nating gawin. If not us, who?”
Malaki naman ang kanyang pasasalamat na may mga nagtatanggol at mas marami pa rin ang positive feedback sa Voltes V: Legacy.
Saad ni Direk Mark, “It’s a mixed bag but there are more positive than negative.
“Once there are people who are bashing, a lot will defend, even from other countries will defend the project.
“So that was very endearing and heartwarming for us.
“And pag nag-viral ang isang show, talagang magba-viral yan, talagang lalabas.”
Malaki ang pasasalamat ni Direk Mark na naging posible ang live-action adaptation ng Voltes V dahil sa kolaborasyon ng GMA-7, Telesuccess, at TOEI Co Ltd., ang original maker ng Voltes V.
Hopeful si Direk Mark na magiging mainit din ang pagtanggap ng viewers kapag nagsimula nang umere ang Voltes V: Legacy sa May 8 sa GMA Primetime Bida.
Matapos ng press conference, nagkaroon ng advanced screening ng special edit ng Voltes V: Legacy, na pasilip sa first three weeks ng teleserye na compressed sa hindi lampas sa dalawang oras. Showing ito sa SM Cinemas mula April 19-25, 2023.