Totoo ang kasabihang "a picture is worth a thousand words," at pinatunayan ito ng mga larawang makikita sa mga social media account ng mga local celebrity na ibinahagi nila ngayong araw ng Pasko.
“Modern family" ang caption ni Pops Fernandez sa larawan nila ng kanyang ex-husband na si Martin Nievera, kasama ang kanilang mga anak na sina Robin at Ram, pati na si Katrina Ojeda, ang ex-live in partner ng Concert King at ang anak nitong si Santino.
Maituturing din na modern family ang Christmas family picture nina Dra. Vicki Belo, Hayden Kho, Jr. at ng kanilang anak na si Scarlet Snow dahil kasama nila si Atom Henares, ang asawa nito at ang direktor na si Quark Henares.
Si Atom ang dating asawa ni Vicki at si Quark ang isa sa kanilang dalawang anak. Wala sa larawan si Cristalle na may sarili nang pamilya na kasalukuyan na naninirahan sa Australia.
Pasok din sa modern family category ang Christmas family picture ni Vice Ganda at ng live-in partner niyang si Ion Perez dahil tanggap na tanggap ng pamilya ng TV host-comedian ang same-sex relationship nila ng kanyang boyfriend.
Ang Christmas family pictures naman nina Dingdong Dantes at Marian Rivera, Alfred at Yasmine Vargas ang magandang halimbawa ng isang ideal family dahil habang tumatagal, lalong tumitibay ang kanilang mga pagsasama.
Sa kauna-unahang pagkakataon, ipinagdiwang nina Luis Manzano at Jessy Mendiola, Dennis Trillo at Jennylyn Mercado ang Pasko bilang mga mag-asawa.
Nagpakasal sina Luis at Jessy noong February 21, 2021 samantalang naganap ang pag-iisang dibdib nina Dennis at Jennylyn noong November 15, 2021.
Bakas naman sa mukha nina Sarah Geronimo at Matteo Guidicelli ang genuine happiness sa Christmas photos na ibinahagi ng aktor sa kanyang social media followers.
Ito ang ikalawang Pasko na ipinagdiwang ni Sarah sa piling ng pamilya ng asawa niya.
Isang proud single mother si Jaclyn Jose sa Christmas picture nila ng kanyang anak na si Andi Eigenmann at ng tatlong apo niya.
Si Pasig City Mayor Vico Sotto na lamang ang nananatiling single sa tatlong anak ni Coney Reyes dahil may pamilya na ang kanyang mga kapatid na sina LA at Carla sa Christmas family photo na makikita sa Instagram account niya.
May kurot sa puso ang Christmas family photo ni Tirso Cruz III dahil habambuhay nang dadalhin ng pamilya niya ang pangungulila sa kanyang panganay na anak na si TJ na sumakabilang-buhay noong November 2018.
Ang larawan ni Lyn habang hawak nito ang heart-shaped urn na naglalaman ng abo ni TJ ang patunay na kailanman, hinding-hindi malilimutan ng kanilang pamilya ang anak niyang namayapa.
Isang pambihirang karanasan para kay Ai-Ai delas Alas na ipagdiwang sa Amerika ang Pasko na tanging sila lamang ng kanyang asawa na si Gerald Sibayan ang magkasama dahil nasanay na siya na kapiling ang mga anak niya sa araw ng pagsilang ni Hesus Kristo.
Use these Shopee vouchers when you shop or order online. Marami pang ibang coupons dito.
