One-on-one naming nakakuwentuhan ang young superstar na si Judy Ann Santos noong Huwebes ng gabi, March 27, at ang naging sentro ng usapan namin ay kung paanong napamahal kay Juday ang Cuyo at ang iba pang isla sa Palawan na naging "second home" niya habang nagsu-shooting ng pinakabago niyang pelikula, ang Ploning.
"Napakaganda ng lugar!" simula ni Judy Ann. "At yung mga tao sa Cuyo, sobrang kalmado. Yung kuntento sila sa kung ano'ng buhay nila, hindi sila naghahanap ng higit sa kung ano pang meron sila," umpisang pahayag ni Judy Ann sa PEP (Philippine Entertainment Portal).
Tipikal na probinsiya kung i-describe ni Judy Ann ang Cuyo.
"Oo, yun nga yung ang sarap ng buhay. Hindi ka magtataka kung bakit si Ga [Dante Nico Garcia, Ploning's director], bilang tao, napakamasayahin, napakagaling umatake sa buhay, kasi galing siya sa isang lugar na kalmado yung mga tao, na relax lang sila."
Hindi raw mahirap mangumbinsi ng mga turista na dayuhin ang Cuyo.
"Kasi napaka-virgin nung island. And the people dun sa island, sobrang babait nila. Yung mag-iwan ka ng cell phone...kami nag-iiwan kami ng cell phone sa labas ng bahay, pero hindi nawawala. Yung ganun.
"Yung walang...siguro kung may makukulong man sa kanila, dahil sobrang lasing, yung ganu'n. Pero walang magnanakaw, walang nangre-rape, walang nagsasaksakan, walang ganu'n.
"Tsaka sa liit ng pulo, magkakakilala silang lahat."
Ibang experience daw talaga ang pag-stay niya sa Cuyo.
"Very rural, masaya, kasi there's no Internet, ‘tsaka ang TV mga hanggang 2 a.m., ‘tapos lahat ng tindahan, sarado na by 6 pm.
"Yung kung gusto mo talagang maka-experience ng kalmadong buhay, dun ka.
"‘Tapos may isang island kaming pinuntahan, which is called Pandan Island, na sobrang ganda! Sobrang ganda talaga, ang ganda nung dagat nila. ‘Though yung Pandan Island, yun ang pinakamagandang dagat, kasi sa Cuyo, maganda din naman, ang ganda nung waves, pero hindi naman ganun din kalalim ‘yung dagat niya, pero malinis."
Puwedeng i-compare ang Pandan sa Boracay?
"Magkaiba, kasi hindi siya yung pinong sand. Dalawang parts yung Pandan Island, e. Yung isang part, pinung-pino yung sand. Yung kabilang part, batu-bato. Pero wherever part of the island ka magpunta, picture-perfect siya. Ganu'n siya kaganda. Yung talagang sasabihin mo na ang ganda ng Pilipinas. Maganda siya, hindi lang na-e-explore.
"Kung iga-guard nila yun, ‘tsaka yung mga isda...‘tsaka walang mga dynamite fishing dun."
Walang bars along the whole strip of the beaches na tulad sa Boracay at sa Puerto Galera.
"Wala, pero siyempre merong puwede kang bilhan ng mga wine, ng mga beer." Pero dahil hindi nga komersyal na lugar, limitado lang at para sa mga residente lang talaga.
"Yeah, which is why I like the island, sobra. Dahil hindi pa siya nako-commercialized. Parang feeling mo...ang ganda-ganda ng lugar."