Sa seryeng Maging Akin Ka Lamang ng GMA-7 ay kontrabida ang role ng young actress na si Arci Muñoz. Sa huling serye niya, sa Pati Ba Pintig ng Puso ay kontrabida rin siya versus ang bidang si Yasmien Kurdi.
Laging kontrabida role ang ibinibigay ng Siete kay Arci, pero okey lang yun sa dalaga. Enjoy naman daw siya sa pagiging character actress.
"Mas enjoy po ako sa kontrabida role kasi para sa akin mas challenging yun at hindi po ako nasasaktan. Ako po ang nanakit," sabi ni Arci sa panayam sa kanya ng PEP (Philippine Entertainment Portal) sa pocket presscon para sa kanya ng GMA Artist Center na ginanap kahapon, April 2 sa Cheescake, Tomas Morato Ave., Q.C.
Effective namang kontrabida sa telebisyon si Arci dahil may mga times na ‘pag naglalakad daw siya ay may mga nagagalit sa kanya.
"Pero hindi naman sila yung talagang nagagalit sa akin. Parang sinasabi lang nila, 'Ang sungit-sungit mo! Idol ko si Yasmien, ba't mo siya sinasaktan? Pero gusto rin kita.'" Natatawang kuwento ni Arci.
IDOL. Si Cherie Gil ang paboritong character actress ni Arci.
"Napapanood ko yung mga pelikula niya before at sa TV rin. Magaling talaga siyang kontrabida. At saka yung style niya, hindi siya yung parang palengkera na ano.
Kasi ganoon din po palagi yung role ko, yung disente, na mayaman, yung maarte na mataray. Para nga pong si Ms. Cherie Gil at ni Ms. Celia Rodriguez."
MISS WORLD. Samantala, may plano pala si Arci na sumali sa Bb. Pilipinas. Pangarap din niyang maging isang beauty queen balang araw.
"Sumasali na naman po ako sa mga beauty contest noon pa. Pangarap ko namang sumali sa Bb. Pilipinas pero siguro two years pa from now.
"Gusto ko kasing isali ang kapatid ko roon, next year, e. Ayoko namang magkalaban kami. Saka sasali rin yung friend kong si Rhea [Nakpil, kasabay niya sa StarStruck]. Ayoko namang kami ang maglaban-laban," sambit pa ni Arci.
Ang title na Miss World ang gustong masungkit ni Arci once na nag-join na siya sa Bb. Pilipinas.
"Kasi wala pa namang nananalo sa ating Miss World, di ba? Malay ninyo kapag halimbawang ako ang nag-represent sa bansa natin para sa Miss World, ako ang kauna-unahang makakuha ng title? ‘Di naman po masama ang mangarap, di ba?"
Maraming hindi nakakaalam na rakista itong si Arci. In fact, may banda siya, yung Fhilia, kung saan ay siya ang lead vocalist.
Mapapanood si Arci sa April 5 sa Amoranto Stadium kasama ang kanyang banda para sa benefit concert na For Thy Sake, kasama ang ilan pang mga sikat na banda. Ang proceeds nito ay mapupunta sa Unang Hakbang Para sa Kinabukasan, project ng GMA Kapuso Foundation.