For the first time, dalawang pelikula ng young actor na si Carlo Aquino ang kasali sa 2008 Metro Manila Film Festival (MMFF). Kasama siya sa cast ng Ang Tanging Ina sequel, Ang Tanging Ina Ninyong Lahat ng Star Cinema Productions. Nasa cast din siya ng period film na Baler ng Viva Films.
Ngayon nga lang daw magiging busy ulit sa shooting si Carlo at sana raw ay hindi magsabay para hindi siya malito sa dalawang set.
"Nagsu-shooting na kami for part two ng Ang Tanging Ina. Yung Baler naman, before matapos yata itong buwan. May script naman na ako kaya excited ko rin gawin kasi ngayon lang ako gagawa ng period movie.
"'Tsaka first time kong makakatrabaho sina Anne Curtis na gaganap na kapatid ko. Pati na rin si Kuya Ipe [Phillip Salvador], first time ko makakatrabaho bilang tatay ko sa movie. Si Jericho [Rosales] kasi nakatrabaho ko na siya before sa Bagong Buwan," lahad ni Carlo sa PEP (Philippine Entertainment Portal).
Ang huling MMFF movie ni Carlo ay Mano Po 3: My Love kung saan bida sina Vilma Santos at Christopher de Leon. Si Carlo ang gumanap na batang Boyet de Leon at si Angelica Panganiban naman ang gumanap na batang Vilma.
Habang wala pang bagong TV show si Carlo sa GMA-7, o sa ABS-CBN, kinuha siya para maisama sa bagong show ng TV5 na Rakista, sa direksiyon ni Quark Henares. Kasama rin ni Carlo rito sina Denise Laurel, Rhea Nakpil, Charles Christiansen, at Alchris Galura. Tungkol ito sa pagbuo ng isang banda at ang mga problemang kinahaharap nila para sumikat.
Natutuwa si Carlo dahil bagay na bagay nga raw ang show sa kanya. Mahilig kasi sa music si Carlo at sa katunayan, lead vocalist siya ng kanyang sariling banda na Kollide.
"Huling TV show ko was Maging Akin Ka Lamang sa GMA-7. Parang tumama sa akin ang show na Rakista sa TV5. Hindi lang siya drama, may konting comedy at may mga musical numbers kami. Mga original songs ang gamit namin sa show kaya ibang-iba siya. Iba kasi si Direk Quark makaisip ng kuwento," sabi ni Carlo.
Dahil sa sobrang busy ngayon ni Carlo, naudlot ang plano niyang lumipad patungong Amerika para magbakasyon. Balak niya sanang mag-Pasko sa Amerika, pero hindi raw siya pinayagan ng Viva Artist Agency at ng mommy niya.
"Plan ko sana na after ng shooting ng two movies ay pumunta ako ng U.S. para magbakasyon. Pero sabi sa akin ni Tita VR [Veronique del Rosario], hindi puwede kasi dalawang movies ang ipo-promote ko. Kailangan kaming sumakay ng float sa parade.
"'Tapos sinegundahan pa ni Mommy. Huwag ko naman daw silang layasan sa Pasko. Gusto niya na kumpleto kami. Kaya okey lang, wala naman akong magawa kung sila mommy at Tita V.R. na ang humiling."
Wala raw nililigawan si Carlo ngayon. Set aside daw muna ang babae dahil marami raw siyang trabaho ngayon at ayaw niyang ma-distract.