First serious and mature role ng young actress na si Maxene Magalona ang bagong Sine Novela ng GMA-7, ang Una Kang Naging Akin. Gagampanan ni Maxene dito ang role na unang ginampanan ni Sharon Cuneta sa pelikula ng Viva Films, na tinampukan din nina Gabby Concepcion at Dawn Zulueta at idinirek ni Laurice Guillen.
Kilala si Maxene sa pagiging conservative, pero this time, hindi na maiiwasan ang mga kissing scenes at love scenes sa pagitan nila ng leading man niyang si Wendell Ramos, na siya namang gumaganap sa dating role ni Gabby; si Angelika dela Cruz naman ang gaganap sa role ni Dawn.
Naitanog nga agad kay Maxene during the presscon of Una Kang Naging sa Mandarin Suites sa Gateway Mall kagabi, August 28, kung may mga limitasyon ba siyang isine-set before she accepted the role.
"Well, I respect kasi the production and I respect Direk Joel Lamangan. Kung ano ang gusto nila at makakayanan ko, I try myself to do it. But I think, even sila, alam naman nila na this is my first mature role at alam naman nilang hindi pa ako ready to do all out talaga na out there, daring talaga.
"I don't think if I'm gonna be ready for that anytime soon. But I think, iba talaga ang makikita nila sa akin dito. Ibang-iba from what I've done in the past," pahayag ni Maxene sa PEP (Philippine Entertainment Portal).
SELF-RESTRICTIONS. Contrary to what others think na ang mga magulang daw niya na sina Francis Magalona at Pia Arroyo ang mas nagbabawal sa kanya to do mature roles, siya raw talaga ang maraming restrictions.
"Actually, sila, they don't have any problem with it," sabi ni Maxene. "It's me talaga at ako ang nagsasabi before na hindi pa ako ready na makipag-kissing scene. So, ako na mismo ngayon ang nagsasabi na I want to try and take the next step, which is next level na. Yung parents ko, they are always supportive at never silang nagsabi na bawal ang ganito at bawal ang ganyan."
Dagdag niya, "Yung mom ko lang, kaya lang niya sinasabing hindi pa puwede, kasi ayoko pa. And as my manager and as my mom, she supports me and respect me kung ano ang gusto ko."
KISSING & LOVE SCENES WITH WENDELL. Nagkaroon na raw siya before ng kissing scene sa Kamandag with Richard Gutierrez. Pero first time daw na may love scene na siya at pagdating naman sa kissing scene, mas defined daw ngayon with Wendell.
"Actually, siyempre yung love scene ang pinaka-daring scene. But I have to accept na ito ang show at napanood ko yung movie and it's really like that. Ang ganda-ganda ng movie kaya I cannot say no to that. Ang ganda ng story at siyempre, ginampanan ito ni Ms. Sharon Cuneta and to be offered that role, tatanggi ka pa ba?
"I was really shocked at first, but I accepted it na lang and looked at it as a challenge. At saka, gusto ko na mapasaya ang mga tao na original fans ng movie na ‘to. Gusto ko, kung anuman ang nakita nila sa movie, magustuhan din nila ang TV show."
Malaking tulong daw na si Wendell ang kapareha niya.
"Kung uunahan ko ng kaba, papangit, e. I know naman na kasi Wendell is mabait and comfortable ako. So, wala nang malisya. Kaibigan niya ang tatay ko. Palagi nga ‘yang takot na takot at sinasabi, ‘Pakisabi hi sa tatay mo,'" tawa ng young actress.
Kinumpirma rin ni Maxene na kahit nasa hospital ang ama na si Francis, ito pa raw ang nagpahatid ng pangungumusta kay Wendell nang malaman na may kissing scene sila.
"Oo! When I was in the hospital, yung dad ko nga, ‘O, ano, kumusta na ang taping n'yo? Sabihin mo kay Wendell, kumusta! Alam na niya yun!'" natatawang kuwento ni Maxene.
PEP asked Maxene kung pagbabanta ba yun sa part ni Kiko for Wendell?
"Hindi naman, hindi naman," sagot niya. "Magkaibigan naman kasi sila. They play basketball. Kaya naman ang dad ko, hindi siya nagdalawang-isip. Alam niya that I'm in good hands with Wendell."
Yung age gap daw nila ni Wendell was never an issue; Maxene being 21 and Wendell is already 31. Mas gusto raw ni Maxene yung ganoon.
"That's the thing, e, kasi he's more experienced," sabi ni Maxene. "He's more matured. Mas gusto ko yun. Kesa yung wala kaming alam na pareho. It's really better na si Wendell ang ka-partner ko rito because he knows fully and I trust him a lot at talagang gina-guide niya ko."
SECOND CHOICE. Tinanong din namin si Maxene kung aware ba siya na may balitang her role was first offered to Iza Calzado, pero tinanggihan daw ito ng aktres.
Ayon kay Maxene, wala raw siyang alam pero, wala rin naman daw problema kung totoo nga.
"I didn't know that. But, thankful ako na sa akin napunta. And it didn't matter kung meron man na ibang na-offer-an. Sa akin napunta and, yun lang, thankful ako for that. Siguro feeling ko, meant to be and it came at the right time kasi nga, I feel more grown up now. I'm 21 already so feeling ko talaga, it's time to make that next move, to the next level."
MASTER RAPPER'S CONDITION. Mas magaan na ring naikukuwento ni Maxene ngayon ang kalagayan ng kanyang ama na si Francis Magalona, who was recently diagnosed with leukemia. Ayon kay Maxene, okey naman daw ang papa niya but he's still in the hospital dahil sa treatment nito.
Ipinakita rin ni Maxene ang MMS picture ng ama na kuha ng mismong oras na ginaganap ang presscon niya. Ito raw mismo ang nagsabi kay Maxene na ipakita sa press ang picture niya para mapabulaanan ang iba't ibang balitang lumalabas about his condition na nandiyang may nagsasabi na na kalbo na ito at sobrang payat na payat.
Base sa MMS picture ni Francis na kuha lang ng 6:50 p.m. kagabi ay iisipin mong wala itong malubhang sakit dahil walang masyadong ipinagbago sa physical appearance niya.
Ayon kay Maxene, "Okey naman siya. He's undergoing treatment. We're awaiting yung orders ng doctor kung kailan siya puwedeng ma-release and to continue yung recovery at home.
"So, naghihintay na lang talaga kami. Pero the doctors were surprised on how well he's responding with the treatment. Very strong siya talaga. Kahit nawawalan siya ng appetite to eat, he still forces himself to eat because he knows that his body needs it," positibong lahad ni Maxene tungkol sa kanyang ama.