Tuwang-tuwa si Movie and Television Review and Classification Board (MTRCB) chairperson Consoliza Laguardia sa pagbabati nina Joey de Leon at Willie Revillame. (Click here to read related article.)
Ayon kay Ms. Laguardia, hindi siya makapaniwala na mangyayari 'yon. Inakala pa raw niyang naglolokohan lang ang dalawa, pero nalaman niyang totoo pala ang pagbabati ng dalawa.
Sina Joey at Willie ang madalas mabigyan ng memo or warning ng MTRCB dahil sa mga maaanghang na sagutan nila sa TV. Pareho na nga raw na na-suspend sa kanilang mga shows ang dalawa dahil sa pagiging masyadong pasaway nila sa TV.
Pero sa pagbabati nga nila Joey at Willie, malaking ginhawa ang naramdaman ni Ms. Laguardia.
"Hindi lang tinik kasi ang dalawang 'yan, para silang mga espada sa dibdib ko!" tawa niya nang makausap siya ng PEP (Philippine Entertainment Portal).
"Noong mapanood ko nga, natuwa talaga ako kasi magiging daan na sila sa maraming changes sa telebisyon. Hindi ko naman masisi ang dalawa kung magpatutsadahan sila sa TV dahil pareho silang mga sikat at nagre-rate ang mga shows nila. Pero minsan nadadala sila ng mga damdamin nila. Doon na sila nagkakaroon ng problema.
"Sinasabi ko naman sa kanila na kapag galit sila, huwag silang haharap sa kamera dahil hindi nila talaga mapigilan ang sarili na magsalita. Kapag nagsalita na silang galit sila, hindi na nila alam ang mga lalabas sa bibig nila. Hindi nila alam na nakakasakit na sila ng kapwa at maraming nakakapanood sa kanila."
Payo parati ni Ms. Laguardia na huwag nilang gamitin ang TV para sa anumang away na personal. Hindi raw interesado ang mga televiewers sa anumang personal na alitan. TV is a medium for entertainment.
"Nakakalimutan na kasi natin na kailangan sila maging entertaining for the people out there to really appreciate them and like them. Sila Joey at Willie naman, they are very likeable people. Marami silang fans at enjoy ang mga tao sa mga ginagawa nilang pagpapatawa. Pero sometimes, they go overboard sa mga emotions nila. Yun ang dapat nilang i-control.
"Pero ngayon at bati na sila, we are all hoping for more pleasing shows from the two of them. Magkaibigan naman kasi ang dalawang ‘yan pero mas namayani ang mga emotions nila. Tumagal din ng almost a year ang alitan nila. But it's really good news na okey na silang dalawa."
Isang araw raw ay iimbitahan niya sina Joey at Willie sa kanyang office sa MTRCB para makausap at malaman kung totohanan ba ang pagbabati ng dalawa.
"Gusto ko lang silang makaharap na dalawa one day at magkausap kami. I want to congratulate them personally sa ginawa nilang effort na 'yon na magkasundo na sila. Yun nga lang huwag lang nilang gawin yung mag-kiss sila sa harapan ko! Gawin na lang nila 'yon in private!" natatawang pagtatapos ng MTRCB chairperson.