Nakakatuwa ang kuwento ni Kim Chiu tungkol sa naging karanasan niya sa pakikipagtrabaho sa Star For All Seasons na si Vilma Santos sa pelikulang The Healing.

Lahad ni Kim, “Ako naman po, siyempre si Governor Vi, Ate Vi, Star For All Seasons, siyempre nahihiya po ako.

“Buti na lang, ang unang eksena namin, wala akong lines. Kasi Ate Vi ‘to! Kinakabahan ako, baka mag-buckle ako!

“Buti na lang sa eksenang yun, wala. Titingin lang ako sa kanya.

“At saka, sobrang down to earth po. Talagang pinapapunta niya ako sa dressing room niya.

“Sasabihin niya, ‘Dito ka, dito, malamig dito sa dressing room ko.’

“Pero nahihiya po ako, so doon na lang po ako sa labas. Nahihiya po talaga ako.”

Nakausap ng PEP.ph (Philippine Entertainment Portal) at iba pang miyembro ng press si Kim sa presscon ng The Healing, noong July 12, sa Dolphy Theater ng ABS-CBN.

Sabi naman ni Vilma, sobrang mahiyain daw talaga si Kim, at literal na hinihila na niya itong pumasok sa dressing room niya.

Pero talaga raw hindi mapilit si Kim.

Paliwanag ng Star Magic talent, “Nahihiya po talaga ako.

“Sasabihin ko, magsi-CR lang ako. Pero, hindi talaga ako magsi-CR, doon lang ako sa labas.

“Pero okay naman po. Sobrang mabait po siyang talaga.

“Hindi niyo po iisipin na siya talaga si Ate Vi… Ate Vilma Santos, wow!”

PERSONAL CHOICE. Kuwento naman ni Ate Vi, personal choice niya talaga si Kim na makasama sa pelikula.

Tumatak daw kasi si Kim sa kanya nang maging guest ng Star For All Seasons sa isang TV special ng ABS-CBN.