Nanghihinayang si Martin del Rosario na hindi siya nakadalo sa grand presscon ng pelikulang The Healing, sa ilalim ng Star Cinema, noong July 12.

Ginagampanan pa naman niya sa naturang pelikula ang role ng anak ng bidang Star For All Seasons at Batangas Governor Vilma Santos.

Ito ang inamin ni Martin nang makausap siya ng PEP.ph (Philippine Entertainment Portal) sa presscon naman ng pinagbibidahan niyang afternoon teleserye sa ABS-CBN, with Denise Laurel—ang Precious Hearts Romances Presents Pintada.

Ginanap ang presscon noong Lunes, July 23, sa Dolphy Theater sa loob ng ABS-CBN compound.

Hindi rin nakadalo si Martin sa premiere night ng The Healing kagabi, July 24, sa Shangri-La Plaza.

Sabi ng young actor, “Nanghihinayang ako talaga... siyempre dahil sa taping ng Pintada. Pero ganun talaga, trabaho kasi e.

“Although nanghihinayang ako kasi The Healing yun, tapos kasama ko si Gov. Vilma, pati yung premiere hindi ko mapapanood.

“Pero ganun talaga.”

Ipinagmamalaki ni Martin na naging bahagi siya ng pelikulang nagbibigay-pugay sa ika-50 anibersaryo sa showbiz ni Ate Vi.

Saad niya, “I’m very proud. Alam mo yung maging anak lang ako ni Vilma Santos, proud na talaga ako. Okay na ako doon na naging anak niya ako.

“Kasi bihira lang na magkaroon ng ganung experience na makasama mo yung Star For All Seasons, di ba?”

MEMORABLE MOMENTS. Ikinuwento rin ni Martin sa PEP ang hindi niya makalilimutang karanasan with Ate Vi.

“Pinasama niya ako sa tent niya. Magri-read lines kami.

“Tapos ano siya… yung talagang magbibigay na iyan ng food. ‘Tabi ka rito sa akin,’ sasabihin niya. Talagang sobrang sweet niya.”

Pakiramdam nga raw niya ay naging totoong nanay sa kanya si Ate Vi habang nagsu-shooting sila ng The Healing.