Marami-rami nang pelikula si Dolly de Leon na mapapanood after Triangle of Sadness.
Noong Marso ay nagsyuting siya sa Atlanta, Georgia para sa Hollywood action-comedy na Grand Death Lotto. Bago mag-Oscars ay nag-shoot na sila.
Kumusta ang mga bida roon na sina John Cena, Awkwafina, at Simu Liu?
“Hindi ko sila na-meet dahil hindi ko sila kaeksena. Oo, and I cannot elaborate on this, kasi spoiler, e,” lahad ni Dolly nang makausap ng Philippine Entertainment Portal (PEP.ph) sa FDCP Parangal ng Sining noong Abril 23, Linggo ng gabi, sa Seda Hotel Vertis North, Diliman, Quezon City.
Cameo lang doon si Dolly, at one day lang siya nag-shoot. Ang nakaeksena niya ay si Seann William Scott, ang gumanap na Stifler sa American Pie (1999). Ang direktor nila ay si Paul Feig, na nagdirek ng Bridesmaids (2011).
Papuri ni Dolly kay Direk Paul: “Napaka-talented, napaka-irreverent, and napaka-funny pero at the same time, very gentlemanly.
“He’s a very interesting character! I love working with him!”
Itong Grand Death Lotto bale ang officially first Hollywood film niya. Yung Triangle of Sadness ay internationally co-produced.
Pag-ayon ni Dolly, “And that was my first Hollywood studio film. Ahhm it was great. Ahh ang sarap-sarap ng feeling na nandoon ako.
“Ahhmm it felt very safe on set. Everyone was very supportive. Lahat nagtutulungan. Tsaka yung culture of ‘Magkakapareho tayo, we’re one team, and we’re working as one’ was very prevalent sa kanila.
“But I also did my very first independent Hollywood film which is Between The Temples.
“Another fabulous experience, great experience talaga. Jason [Schwartzman] was a dream to work with, such a great, nice, warm guy. He’s very supportive, yun.”
Eight days nag-shoot si Dolly para sa Between The Temples.
TWO FILMS FOR CINEMALAYA 2023
Dalawa ang pelikula ni Dolly sa Cinemalaya 2023 — Iti Mapukpukaw (The Missing) ni Carl Joseph E. Papa, at Ang Duyan ng Magiting ni Dustin Celestino.
“Oo, greedy ako, bakit?! Masama ba maging greedy?! Ha! Ha! Ha! Ha!” pagtawa ni Dolly.
“Gutom ako buong buhay ko! Ngayon gusto kong magpakabusog!”
Kasabay ni Dolly ang Cinemalaya na pinarangalan sa unang FDCP Parangal ng Sining. Ang lima pang honorees doon ay sina Vilma Santos, Mother Lily Monteverde, Soliman Cruz, Direk Martika Escobar, at NickDeocampo.
ON WORKING WITH ELIJAH AND ZANJOE
Natapos din ni Dolly ang Keys to the Heart, kasama sina Elijah Canlas at Zanjoe Marudo, sa direksiyon ni Kerwin Go.
Pinoy adaptation ito ng 2018 South Korean comedy drama film, na idinirek ni Choi Sung-hyun, at tinampukan nina Lee Byung-hun, Youn Yuh-jung, at Park Jeong-min.
Ang Pinoy version ay prinodyus ng Reality MM Studios, at nasa cast din sina Michelle Dee at FDCP Chair Tirso Cruz III.
Kumusta si Elijah, na isa sa best young actors today sa local showbiz?
“Naku, alam mo si Elijah, he’s not only gifted with talent. He’s also gifted with charm, charisma and kindness,” saad ni Dolly.
“And that’s what I love…”
And intelligence, too.
Napatango si Dolly, “And intelligence, but for me, ang primary asset a human being can have is kindness, and Jelo [palayaw ni Elijah] has that.
“So, I’m just proud to have been able to work with him.”
E, si Zanjoe?
“OK na OK, cool yun. Si Z [palayaw ni Zanjoe] naman ever since, napakaano niya, e. Chill lang na tao, mabait you know,” sabi ni Dolly.
“Also very talented. So excited akong mapanood niyo yun. And meron din akong Salome with Teng Mangansakan, which they’re working now on post.”
Ipapasok sa mga filmfest ang Salome.
OTHER UNRELEASED PROJECTS
Natapos din ni Dolly ang AQ Prime movie na Pura Serbidora ni Direk Louie Ignacio, sa panulat ni Dennis Evangelista.
Tampok din sa Pura Serbidora sina Elizabeth Oropesa, Dexter Doria, Paolo Rivero, Carlos Dala, Elijah Filamor, Emelyn Cruz, Tabs Sumulong, at Joni McNab.
“Matagal ko nang ginawa yan na hindi pa lumalabas. Yung Pura Serbidora, parang August ko pa yata ginawa yun before I flew to the States pa, e,” sambit ni Dolly.
“Tapos yung Iti Mapukpukaw at Ang Duyan ng Magigiting, last year ko pa yun ginawa. Yung Keys to the Heart ang this year lang. Recent.
“Saka yung series na Simula Sa Gitna, yung kay Antonette Jadaone. Siya yung parang Hintayan ng Langit na series.
“Si Maris Racal ang bida namin, saka si Kahlil Ramos. Kasama ko rin doon si Joel Saracho, and Adrian Lindayag. Ipapalabas siya sa Prime Video.”
ONE-TIME ONLY RULE
May next project pa ba para sa kanya si Ruben Ostlund, ang direktor ng Triangle of Sadness?
“Hindi, e. Kasi sabi niya, hindi daw siya umuulit ng artista. OK na rin,” pagsisiwalat ni Dolly.
“Naiintindihan ko rin yun, e. Kasi siyempre, gusto mo ring i-expand yung horizons mo, and to work with many different…
“Ako rin, I like to work with different types of directors — although I enjoy working with the same directors na paulit-ulit, like Direk Tonette, si Sigrid Bernardo, si Erik Matti. Yun, I enjoy na paulit-ulit.”
Nag-one day shoot si Dolly sa series ni Erik Matti na Call My Manager!, ang Pinoy adaptation ng French comedy-drama series na Call My Agent! (Dix pour cent).
Ipapalabas iyon sa HBO, at bida roon sina Edu Manzano at Angel Locsin. As herself ang papel niya roon.
Sa Mayo at Hunyo ang shooting nila ni Kathryn Bernardo para sa Star Cinema movie na A Very Good Girl.
Sa Agosto ay aalis siya pa-Germany para sa shooting ng Season 2 ng isang series na napapanood ang Season 1 sa Prime Video. Naka-lock in siya roon hanggang Marso 2024.
Eight episodes ang nasabing series. Kaya more or less ay isang buwan ang inilaan para sa shooting ng bawat episode.
Saan sa Germany sila magsu-shoot?
“They’re talking about Munich but wala pang final na location. But they’re talking about Munich,” pakli ng aktres.
FULLY BOOKED
Abalang-abala si Dolly. Fully booked siya for the rest of the year.
“Well, you know what, guys, this is what I’ve been waiting for all my life… to be booked and busy,” pagngiti ni Dolly.
“And I think that’s a good thing. I mean, habang may lakas pa tayo, di ba? Sabak na! I mean, we don’t know how long this ride is going to last.
“So might as well make the most of it.”
Saan siya humuhugot ng energy para sa kanyang hectic schedule? Nakaka-overwhelm iyon, di ba?
“You know, I take the time to take a break. Binibigyan ko ang sarili ko ng break,” salaysay ni Dolly.
“I take time off, and that’s how I cope. Kasi kung tuluy-tuloy tayo, hindi talaga tayo magla-last.
“So I really have to find the work-life balance in everything I do.”
Nagtaas ba siya ng talent fee?
Natawa nang wagas si Dolly: “Ha! Ha! Ha! Ha! Ha! Grabe! Ahhmm… siguro, masasabi kong yung talent fee ko ngayon is kung ano yung tapat.
“Kung ano yung tapat, na dapat lang hindi lang para sa akin kundi para sa iba pang artistang katulad ko.”