Isa nang ganap na Kapamilya si Lovi Poe.
Pumirma ng exclusive contract ang dating Kapuso actress sa ABS-CBN ngayong Huwebes, September 16.
Present sa kanyang contract signing sa ABS-CBN compound sina Dreamscape Entertainment head Roldeo Endrinal, ABS-CBN bosses Carlo Katigbak, Cory Vidanes, Mark Lopez, Rick Tan, at ang manager ni Lovi na si Leo Dominguez.
Saad sa post ng ABS-CBN: "The guessing game is over as ABS-CBN revealed its new precious jewel, Lovi Poe."
Base sa caption, si Lovi nga ang tinutukoy ng teaser na ipinost ng ABS-CBN noong nakaraang linggo tungkol sa isang "precious jewel finding a new home."
Nakatakdang humarap si Lovi sa isang media conference ngayong araw para ianunsiyo ang unang proyektong gagawin niya bilang Kapamilya.
Ilang oras bago ang kanyang contract signing sa ABS-CBN, nag-post ng mensahe ng pasasalamat si Lovi sa GMA-7, na naging tahanan niya sa loob ng 15 taon.
Nagsimula si Lovi bilang Kapuso noong taong 2006 at nagbida sa iba-ibang teleserye ng Kapuso network.
May ilang beses ding nakatungtong sa Kapamilya network si Lovi para mag-guest sa iba't ibang ABS-CBN talk shows tulad ng Gandang Gabi Vice, The Buzz, at Magandang Buhay.
Nakagawa rin siya ng digital movie under Dreamscape Entertainment, ang Malaya, na ipinalabas sa streaming app ng ABS-CBN na iWant TFC.